ગુજરાત વિધાનસભાની ચૂંટણીને લઇને વડોદરામાં ભાજપ-કોંગ્રેસ વચ્ચે કાંટે કી ટક્કર જામી છે. સાવલીના ભાજપના ઉમેદવાર કેતન ઈનામદારે કોંગ્રેસ ઉમેદવાર કુલદીપસિંહ રાઉલજી પર પલટવાર કર્યો છે.
ધમકીની રાજનીતિ કેટલી યોગ્ય?
કુલદીપસિંહે વિરોધીઓને આપી હતી ધમકી
ધમકી બાદ ભાજપ ઉમેદવાર કેતન ઈનામદારે કર્યો પલટવાર
'જેમણે જીવનમાં મચ્છર નથી માર્યું તે આંગળી કાપવાની કરે છે વાતો'
ગુજરાત વિધાનસભાની ચૂંટણીના ધમધમાટ વચ્ચે વડોદરાના સાવલી બેઠકના કોંગ્રેસ ઉમેદવાર કુલદીપસિંહ રાઉલજીનો એક વીડિયો વાયરલ થયો હતો. જેમાં તેઓ વિરોધીઓને ધમકી આપતા જોવા મળતા હતા. આ મામલે ભાજપના ઉમેદવાર કેતન ઈનામદારે પલટવાર કર્યો છે.
ભાજપ ઉમેદવાર અને ધારાસભ્ય કેતન ઈનામદારનો પલટવાર
કેતન ઈનામદારે કહ્યું કે, 'જેમણે જીવનમાં મચ્છર નથી માર્યું તે આંગળી કાપવાની વાતો કરે છે. જનતા બધાને બહુ સારી રીતે ઓળખે છે. કુલદીપસિંહ રાઉલજી સસ્તી પ્રસિદ્ધિ માટે પ્રયાસ કરે છે અને ચર્ચામાં રહેવા માગે છે.'
કુલદીપસિંહ રાઉલજીએ વીડિયો વાયરલ થયા બાદ કરી સ્પષ્ટતા
તો આ વાયરલ વીડિયો મામલે કુલદીપસિંહ રાઉલજીએ સ્પષ્ટતા કરી છે. તેમણે કહ્યું કે, 'મારા મંડળીના સભાસદો, પ્રમુખ અને મહામંત્રીઓ ધમકાવવામાં આવે છે. ચૂંટણી ચૂંટણીની રીતે લડવી જોઈએ. જેથી હું માત્ર મારા દૂધ ઉત્પાદકોને ન ધમકાવવા અંગે કહી રહ્યો હતો. દૂધ ઉત્પાદકોને હેરાન ન કરવાનું મેં કહ્યું હતું.'
અગાઉ કુલદીપસિંહનો વીડિયો થયો હતો વાયરલ
આપને જણાવી દઈએ કે, થોડા દિવસ અગાઉ સાવલી બેઠકના કોંગ્રેસ ઉમેદવાર કુલદીપસિંહ રાઉલજીનો વિરોધીઓને ધમકી આપતો વીડિયો વાયરલ થયો હતો. જેમાં તેઓએ જણાવ્યું હતું કે, 'હું જાહેરમાં કહું છું કે મારો સાવલી તાલુકો હોય કે ડેસર તાલુકો હોય કોઈએ પણ મારા દૂધ મંડળીના પ્રમુખ-મંત્રી સામે આંખ કરી છે ને તો આંગળી ન કાપી નાખું તો મારું નામ કુલદીપસિંહ નહીં.'