ગુજરાતની આ મહત્વની લોકસભા બેઠક પર ભાજપ કોળી ઉમેદવારને આપશે ટિકિટ!

જૂનાગઢ લોકસભા બેઠક પર ભાજપ કોળી ઉમેદવારને ટિકિટ આપી શકે છે. જૂનાગઢ બેઠક પર રાજેશ ચુડાસમાની ટિકિટ કપાઈ શકે છે. વિધાનસભા ચૂંટણીના પરિણામનું ફેક્ટર પણ જવાબદાર ગણી શકાય છે. કુંવરજી બાવળિયા પર ચુડાસમાના સમર્થકોમાં નારાજગી ફેલાઈ છે. સુરેન્દ્રનગર બાદ જૂનાગઢમાં પણ કોળી સમાજના સાંસદની ટિકિટ કપાઈ શકે છે.



સૂત્રો દ્વારા મળતી માહિતી મુજબ ભાજપ નેતાઓ પણ વિમલ ચુડાસમાના સંપર્કમાં છે.





ચુડાસમાના સમર્થકો સામે દીનુ સોલંકી સમર્થક જૂથ થયું સક્રિય
જૂનાગઢ લોકસભાની બેઠકને લઈને સમર્થકોમાં હોડ જામી છે. સાંસદ રાજેશ ચુડાસમાના સમર્થકો સામે દીનુ સોલંકી સમર્થક જૂથ સક્રિય થયું છે. એક તરફ ચુડાસમાને ટિકિટ મળે તે માટે રાજેશ ચુડાસમાના સમર્થકો પણ કમલમ્ બેઠક કરી હતી. તો બીજી તરફ દીનું સોલંકીના સમર્થકોનું જૂથ સક્રિય થયું છે. આ જૂથ દ્વારા દીનુ સોલંકીને ટિકિટ આપવા માટે માગ કરવામાં આવી છે. દિનુ સોલંકીના સમર્થકોએ સોશિયલ મીડિયામાં ટિકિટની માગ કરી છે. ગીર સોમનાથ અને જૂનાગઢનાં ગ્રુપોમાં મેસેજ વાયરલ થયા છે. જેમાં દીનું સોલંકીની કામગીરીના વખાણ કરવામાં આવ્યા અને જો ટિકિટ આપવામાં આવે તો જીતની આશા પણ વ્યક્ત કરવામાં આવી હતી.



જૂનાગઢ લોકસભા બેઠકને લઇને ભાજપ-કોંગ્રેસ ઉમેદવારની પસંદગી મુશ્કેલીમાં
જૂનાગઢ લોકસભા બેઠકને લઇને ભાજપ-કોંગ્રેસ ઉમેદવારની પસંદગી મુશ્કેલીમાં બંને પક્ષમાં કોકડું ગૂંચવાયુ છે. ભાજપ-કોંગ્રેસ હજુ ઉમેદવારોની પસંદગી કરી શક્યા નથી. ભાજપ રાજેશ ચુડાસમાને રિપીટ નહીં કરે તેવી શક્યતાઓ છે. જોકે, પોતાની ટિકિટ કપાવાની શક્યતાઓ વચ્ચે કોળી નેતા ચુડાસમા જીતુ વાઘાણીને મળ્યા હતા.



તો આ બેઠક પરથી વર્તમાન સાંસદ રાજેશ ચુડાસમાને લઇને અન્ય સમાજોમાં નારાજગી છે. ખાસ કરીને આહિર સમાજના વિરોધથી ભાજપ મુશ્કેલીમાં મુકાઈ શકે છે. કારણ કે, આહિર સમાજે ભાજપ વિરોધ મતદાન કરવાનો ઠરાવ પસાર કર્યો છે. તો રાજેશ ચુડાસમાની કામગીરી અંગે જૂનાગઢના લોકોમાં પણ નારાજગી જોવા મળી રહી છે. જેને લઈને ચુડાસમાની જગ્યાએ અન્ય મજબૂત ઉમેદવાર અંગે ભાજપ વિચાર કરી રહ્યું છે. જૂનાગઢથી ભાજપ આહિર અથવા કારડિયા આગેવાનને ટિકિટ આપી શકે છે. ભાજપ રાજશી જોટવા અથવા દિનુ સોલંકીને ટિકિટ આપી શકે છે. 



તો બીજી તરફ જૂનાગઢથી ઉમેદવાર પસંદગી મામલે કોંગ્રેસમાં પણ અવઢવ છે. જૂનાગઢથી કોંગ્રેસમાં પુંજા વંશ અને હર્ષદ રિબડિયાનું નામ ચર્ચામાં છે. આ ઉપરાંત પૂર્વ સાંસદ જશુ બારડના પુત્રને પણ કોંગ્રેસ મેદાને ઉતારી શકે છે. તો સોમનાથના ધારાસભ્ય વિમલ ચુડાસમાની પત્નીનું નામ પણ ચર્ચાઈ રહ્યું છે ત્યારે જૂનાગઢ બેઠકનું ગણિત જાતિગત સમીકરણોમાં ફસાયું છે.