ઉત્તર પ્રદેશ વિધાનસભા ચૂંટણી પહેલા વધુ એક પોલમાં ભાજપને સ્પષ્ટ બહુમતી મળે તેવું અનુમાન છે.
ઉત્તર પ્રદેશમાં 2022ની શરૂઆતમાં વિધાનસભા ચૂંટણી
વધુ એક સર્વેમાં યોગીની થઈ રહી છે વાપસી
કોંગ્રેસને ગણવા ખાતર માત્ર 5 જ સીટ: સર્વે
આગામી વર્ષ 2022માં ભારતમાં વિધાનસભાની ઘણી બધી ચૂંટણીઓ આવી રહી છે, વર્ષ શરૂઆતમાં પાંચ રાજ્યોમાં ચૂંટણી થશે અને તે બાદ વર્ષનાં અંત સુધીમાં ગુજરાતમાં પણ વિધાનસભા ચૂંટણી થવાની છે, આ જ કારણ છે કે વર્ષ 2022ને વર્ષ 2024ની ચૂંટણીનું સેમીફાઇનલ ગણવામાં આવે છે. આમ તો દરેક રાજ્યની ચૂંટણીનું મહત્વ છે પરંતુ આખા દેશનાં રાજકારણ પર ગુજરાત અને ઉત્તર પ્રદેશ પર આખા દેશની નજર હશે, આ બે રાજ્યો દેશની દશા અને દિશા નક્કી કરવામાં મહત્વનો ભાગ ભજવે છે ત્યારે ઉત્તર પ્રદેશને લઈને જુદા જુદા ઓપીનીયન પોલ સામે આવી રહ્યા છે.
યુપીને લાગ્યો ભગવો રંગ
ઉત્તર પ્રદેશ વિધાનસભા ચૂંટણી માટે વધુ કે સર્વે સામે આવ્યો છે જેમા ભારતીય જનતા પાર્ટી જોરદાર વાપસી કરતી દેખાઈ રહી છે. આખા રાજ્યમાં યોગી યોગી છવાઈ ગયા હોય તેવું લાગી રહ્યું છે. TIMES NOW-Polstrat નાં સર્વે અનુસાર ભાજપ આ ચૂંટણીમાં પહેલા નંબર પર રહેશે અને 239 થી 245 બેઠકો મળવાનું અનુમાન છે.
પ્રિયંકા ગાંધીની બધી મહેનત કશું કામમાં નહીં આવે!
નોંધનીય છે કે આ ચૂંટણીનાં સર્વે અનુસાર અખિલેશ યાદવની સમાજવાદી પાર્ટી 119 બેઠક સાથે બીજા નંબર પર હશે જ્યારે માયાવતીની પાર્ટી બસપાને માત્ર 28 બેઠકો મળશે. આટલું જ નહીં પ્રિયંકા ગાંધી એડીચોટીનું જોર લગાવી રહ્યા છે છતાં યુપીની 403 બેઠકમાંથી કોંગ્રેસ માત્ર 5થી 8 જ બેઠક મળે તેવું અનુમાન સર્વેમાં સામે આવ્યું છે.
યોગી યુપીનો ઈતિહાસ બદલશે!
નોંધનીય છે કે ઉત્તર પ્રદેશનાં ઈતિહાસમાં કોઈ મુખ્યમંત્રી સતત બીજી વાર સત્તા પર આવ્યા નથી, જો આ સર્વે સાચો પડે તો યોગી આદિત્યનાથ યુપીનો ઈતિહાસ ઉથલાવી નાંખશે અને રેકોર્ડ બનાવશે. 403 વિધાનસભા બેઠક ધરાવતા યુપીમાં સરકાર બનાવવા માટે 202 સીટની જરૂર છે.
2017માં ખોટા પડ્યા હતા સર્વે
નોંધનીય છે કે વર્ષ 2017માં જ્યારે ચૂંટણી હતી ત્યારે ચૂંટણી પહેલા ઘણા બધા સર્વે આવ્યા હતા જેમા ત્રિકોણીય જંગ થશે તેવું અનુમાન હતું પણ ભાજપે સૂપડા સાફ કરીને આખા રાજ્યમાં રેકોર્ડબ્રેક બેઠકો હાંસલ કરી લેતા તમામ સર્વે ખોટા પડ્યા હતા. જોકે આ વખતે શું થાય છે તે જોવું રહ્યું.