મહામારી / રસી લેવા કોઈ ઉત્સાહ ન હતો, તંત્રએ એવી જાહેરાત કરી કે લોકો લેવા માટે તૂટી પડ્યાં

• ચેન્નઈ નજીકના માછીમારોના ગામની ઘટના
• કોવલમ ગામના લોકો વેક્સિન લેતા અચકાતા હતા
• એનજીઓએ લકી ડ્રોની યોજના બહાર પાડી
• લકી ડ્રોની યોજના રંગ લાવી,વેક્સિન લેવા લોકોની પડાપડી

લોકો વધારેમાં વધારે સંખ્યા કોરોનાની વેક્સિન લેવા આગળ આવે તે માટે તંત્ર દ્વારા અવનવી જાહેરાતો કરવામાં આવતી હોય છે. ચેન્નઈની થોડે દૂર આવેલા માછીમારોના ગામ કોવલમમાં લોકોને વેક્સિન લેવા પ્રોત્સાહિત કરવા માટે એનજીઓ દ્વારા મફત બિરીયાની અને બીજી ઢગલાબંધ ઓફરોની જાહેરાત કરવામાં આવી. માછીમારોના ગામ કોવલમની વસતી 14,300 છે જેમાંથી 6400 લોકો 18 વર્ષથી વધુ વયના છે. ગામમાં છેલ્લા 2 મહિનામાં ફક્ત 58 લોકોએ વેક્સિન લીધી છે. 

ગામલોકો વેક્સિન લેવા માટે ખચકાતા હોવાથી અહીંની લોકલ એનજીઓ એસએન રામદાસ ફાઉન્ડેશન, એસટીએસ ફાઉન્ડેશન અને ચિરાજ ટ્ર્સ્ટે વેક્સિન ડોઝ લેનાર લોકોને મફત ભોજનની સાથે બીજી પણ ભેટો આપવાની યોજના તૈયાર કરી. 

લોકોમાં રસી લવા પડાપડી, 3 દિવસમાં 345 લોકોએ વેક્સિન લીધી.

મજાની વાત તો એ છે કે મફત બિરીયાની અને બીજી ભેટોની જાહેરાત બાદ તો લોકોમાં રસી લવા પડાપડી થઈ. છેલ્લા 3 દિવસમાં 345 લોકોએ વેક્સિન લીધી. કારણ કે લકી ડ્રો યોજનાથી લોકો આકર્ષિત થયા હતા. 

વેક્સિન લેનાર લોકો લકી ડ્રોમાં મિક્સી, ગ્રાઈન્ડર અને સોનાના સિક્કા જીતી શકે છે 

એનજીઓએ એક વીકલી લકી ડ્રો પણ બનાવ્યો છે જેમા વેક્સિન લેનાર લોકો મિક્સી, ગ્રાઈન્ડર અને સોનાના સિક્કા ભેટ આપવામાં આવે છે. એનજીઓએ એક બંપર ડ્રો પણ બહાર પાડ્યો છે જેમાં વિજેતા થનાર લોકો રેફ્રિજરેટર, વોશિંગ મશીન અને બાઈક પણ જીતી શકે છે. 

કોવલમ ગામને કોરોના મુક્ત બનાવવાનું  લક્ષ્યાંક

રામદાસ ફાઉન્ડેશનના ગૌતમ રામદાસે જણાવ્યું કે કોવલમ ગામને કોરોના મુક્ત બનાવવાનું અમારુ લક્ષ્યાંક છે. ગામમાં લગભગ 7000 લોકો વેક્સિન લેવા યોગ્ય છે. આ તમામ લોકોને વેક્સિન લેવા માટે પ્રોત્સાહિત કરવામાં આવશે અને આ યોજના ચાલુ રાખવામાં આવશે.