ગુંચવણ / ગુજરાતમાં વિચિત્ર ઘટના : સરોગસીથી જન્મેલી દીકરીની કસ્ટડી મેળવવા જૈવિક માતા-પિતા પહોંચ્યા કોર્ટમાં, જાણો શું છે મામલો

• સરોગેટ મધર ક્રિમિનલ કેસમાં આરોપી 
• જો બાળકની કસ્ટડી સોપવામાં ન આવે તો બાળકે માં સાથે જેલમાં જવું પડે 
• બાળકની કસ્ટડી માટે જૈવિક માતા પિતા હાઈકોર્ટમાં પહોચ્યા 

સરોગેટ માં એક ક્રિમીનલ છે 
સરોગસી દ્વારા જન્મેલી બે દિવસની બાળકીના જૈવિક માતા-પિતાએ ગુરુવારે ગુજરાત હાઈકોર્ટમાં અરજી કરીને બાળકની કસ્ટડીની માંગ કરી હતી. કારણ કે સરોગેટ મધર ક્રિમિનલ કેસમાં આરોપી છે અને સિવિલ હોસ્પિટલમાંથી સાબરમતી જેલમાં પરત ફરવું ફરજિયાત છે. સરોગેટ મધરને ડિલિવરી માટે સિવિલ હોસ્પિટલમાં લાવવામાં આવી હતી.

સરોગસી કરાર કર્યો હતો 
30 વર્ષથી વધુ ઉંમરનું આ કપલ રાજસ્થાનના અજમેરનું છે. એક દાયકાથી વધુ સમય સુધી બાળક ન થયા પછી તેણે સરોગસીનો વિકલ્પ પસંદ કર્યો. તેના સંબંધીઓ અમદાવાદમાં રહે છે, તેથી તે મહેસાણાના લખવડ ગામની 31 વર્ષીય છૂટાછેડા લીધેલી મહિલાને મળ્યો હતો, જેણે તેમના બાળકની સરોગેટ માતા બનવાની સંમતિ આપી હતી. દંપતીએ મહિલા સાથે સરોગસીનો કરાર કર્યા બાદ તે બાળકની ચોરી કરીને વેચાણ કરતી ગેંગની સભ્ય હોવાનું બહાર આવ્યું હતું.

સરોગેટ માં સાબરમતી જેલમાં છે
આ ગેંગનો ખુલાસો ફેબ્રુઆરીમાં થયો હતો જ્યારે ચાર મહિનાની બાળકીનું અપહરણ કરીને તેને 2 લાખ રૂપિયામાં વેચી દેવામાં આવી હતી. આ કેસમાં સરોગેટ મધરની આઈપીસીની કલમ 363, 370, 370(એ), 120બી, 114 અને ચાઈલ્ડ જસ્ટિસ એક્ટની કલમ 81, 84, 87 હેઠળ ધરપકડ કરવામાં આવી હતી. 6 એપ્રિલના રોજ સિટી સેશન્સ કોર્ટે તેને જામીન આપવાનો ઇનકાર કર્યો હતો અને ત્યારથી તે સાબરમતી જેલમાં બંધ છે.

બાળકની કસ્ટડી માટે કોર્ટમાં જવું પડ્યું 
જૈવિક માતા-પિતાને બાળકીના જન્મની જાણ થતાં તેઓ સિવિલ હોસ્પિટલ ગયા હતા અને મહિલાએ નવજાત શિશુનો કબજો તેમને સોંપ્યો હતો. પરંતુ પોલીસે પ્રતિકાર કર્યો અને બાળકને તેમની પાસેથી પાછું લઈ લીધું. સરોગેટ મધર જ્યુડિશિયલ કસ્ટડીમાં હોવાથી પોલીસ બાળકની કસ્ટડી માટે કોર્ટના આદેશ પર ભાર મૂકી રહી છે. 

માતા સાથે બાળક જેલમાં જશે ?
આ દંપતીએ એવી આશંકા વ્યક્ત કરી છે કે સરોગેટ મધરને ટૂંક સમયમાં હોસ્પિટલમાંથી રજા આપીને પાછા જેલમાં મોકલી દેવામાં આવશે. તેમણે અરજીમાં કહ્યું છે કે જો બાળકની કસ્ટડી સમયસર ટ્રાન્સફર નહીં થાય તો ડિલિવરી બાદ સરોગેટ મધરની સાથે બાળકને પણ જેલમાં મોકલી દેવામાં આવશે. દંપતીના વકીલ પૂનમ મહેતાએ જણાવ્યું હતું કે સરોગેટ માતા અને દંપતી વચ્ચેના કરારની એક નકલ રજૂ કરવામાં આવી છે જેમાં કહેવામાં આવ્યું છે કે બાળકનો જન્મ થતાંની સાથે જ તેની કસ્ટડી જૈવિક માતા-પિતાને સોંપવામાં આવશે.

48 કલાકના બાળકને કોર્ટના ધક્કા ખાવા પડશે 
વકીલે જણાવ્યું હતું કે સરોગેટ માતા પોતાના બાળકની કસ્ટડી આપવા તૈયાર છે, પરંતુ પોલીસના વાંધાને પરિણામે 48 કલાકના બાળકને અયોગ્ય સજા મળી રહી છે. તેણે તેના કાનૂની અને સત્તાવાર વાલીઓથી દૂર રહેવું પડશે. આ મામલાની સુનાવણી બાદ જસ્ટિસ વી એમ પંચોલી અને જસ્ટિસ આર એમ સરીનની ખંડપીઠે હોસ્પિટલ સત્તાવાળાઓ સહિત સંબંધિત રાજ્ય સત્તાવાળાઓને નોટિસ ફટકારી શુક્રવાર સુધીમાં તેમનો જવાબ માગ્યો હતો.

શું છે સરોગસી?
સરોગસી એ એક મેડિકલ પ્રોસેસ છે જેમાં જે યુગલોને સંતાન નથી અને તેઓ સંતાનની ઈચ્છા રાખે છે તેઓ ભાડેથી કૂખ લે છે. ભાડેથી કૂખ આપનારી મહિલાને સરોગેટ મધર કહેવામાં આવે છે. બાળક મેળવવા ઇચ્છતા દંપતીના શુક્રાણુ અને ઇંડા લઈને લેબમાં તબીબી પ્રક્રિયા દ્વારા ગર્ભ તૈયાર કરવામાં આવે છે. જે તબીબી પ્રક્રિયા દ્વારા જ સરોગેટ માતાના ગર્ભમાં પહોંચાડવામાં આવે છે. બાળક દંપતીનું છે પરંતુ તે બીજી સ્ત્રીના ગર્ભમાં ઉછરે છે. 9 મહિના પછી, જ્યારે બાળકનો જન્મ થાય છે, ત્યારે કરાર મુજબ તે બાળકને જૈવિક માતાપિતાને સોંપવામાં આવે છે.

શું છે સરોગસીનો કાયદો
સરોગસી રેગ્યુલેશન એક્ટ 2021 મુજબ, એક મહિલા જેની ઉંમર 35થી 45 વર્ષ છે. આ મહિલા વિધવા અથવા છૂટાછેડા લીધેલી છે ત્યારે જ સરોગસી માટે સંમતિ આપી શકે છે. કાયદેસર રીતે પરણેલા યુગલો માટે સરોગેટ માતા બની શકે છે. જે લોકો મેડિકલ કન્ડિશનને કારણે બાળક નથી કરી શકતા, તે લોકો જ સરોગસી કરાવી શકે છે.

કેન્દ્ર સરકારે 2021ના કાયદામાં કોમર્શિયલ સરોગસી પર પણ પ્રતિબંધ મૂક્યો હતો. જેથી કૂખ ભાડે આપવાનો ધંધો બંધ કરી શકાય. સરોગસીમાં એક નવી જોગવાઈ ઉમેરવામાં આવી હતી કે જે મહિલા સરોગેટ બનશે તે કપલમાંથી કોઈ એક સાથેની સંબંધી હશે. આ કામ મદદ માટે કરવામાં આવશે, સરોગસી માટે પૈસાની આપલે કરવામાં આવશે નહીં. જો કોઈપણ વ્યક્તિ આમ કરે છે તો તેને 10 વર્ષની જેલ અને 10 લાખ રૂપિયા સુધીના દંડની સજા કરવામાં આવશે.