"છોકરીઓને ભણાવીની શું કામ છે? તેમણે તો એમ પણ મોટા થઇને ચૂલા પર જ કામ કરવાનું છે." સમાજની આવી રૂઢિગત માનસિકતા વચ્ચે ઉછરેલા દલિત સમાજના કલ્પના સરોજે એક નવો ચીલો ચાતર્યો. એક વખત આપઘાતના પ્રયાસ કરી ચૂકેલા અને મુંબઈમાં પ્રતિ દિન 2 રૂપિયાના રોજ ઉપર મજૂરી કરતા કલ્પના આજે જંગી 2000 કરોડની કંપનીના માલિક છે. આવામાં મહિલા દિન નજીક આવી રહ્યો છે ત્યારે VTVGujarati.com આપની સમક્ષ એવી મહિલાની સફળતાની ગાથા લઈને આવ્યું છે જેની કહાની જાણીને કરશો સલામ...
12 વર્ષની ઉંમરે કલ્પનાના લગ્ન તેમની ઈચ્છા વિરુદ્ધ કરાવી દેવાયા હતા. ભણવાની ઈચ્છા ધરાવતા કલ્પનાની નારાજગીને અવગણી દેવામાં આવી. 6 જ મહિનામાં સાસરાપક્ષે કલ્પનાને એટલો ત્રાસ આપ્યો કે તેના પિતા તેને ઘરે પછી લઇ ગયા.
ઘરે પાછા આવ્યા બાદ સમાજના લોકોએ તેને ઘણા ટોણાં ફટકાર્યા. આનાથી કંટાળીને કલ્પનાએ ઝેર પીને આપઘાત કરવાનો પ્રયાસ કર્યો. જો કે પછી તેમણે વિચાર્યું કે જીવન એક જ વાર મળે છે તો કંઈક કરી છૂટવું જોઈએ.
સાજા થયા બાદ કલ્પનાએ પોલીસ અને આર્મીમાં દાખલ થવા અરજી કરી પણ તેઓ અસફળ રહ્યા. ત્યાર બાદ તેઓ એ મુંબઈની એક હોઝિયરી કંપનીમાં 2 રૂપિયા પ્રતિ દિન અને 60 રૂપિયા પ્રતિ મહિનાના રોજથી કામ શરુ કર્યું. તેમના પિતાની પોલીસ કોન્સ્ટેબલ હતા. તેમની પોલીસમાંથી નોકરી છૂટી જતા તેઓ પરિવાર સાથે કલ્પના સાથે મુંબઈ આવી ગયા.
આ દરમિયાન રૂપિયાની તંગીના કારણે ઈલાજ ન થઇ શકવાને લીધે તેમની બહેનનું મોત નીપજ્યું. આ સમયે કલ્પનાને રૂપિયાનું મહત્વ સમજાયું.
કલ્પનાએ 50000 રૂપિયાની લોન લઇને બુટિક અને ફર્નિચરનો ધંધો ચાલુ કર્યો. આ સાથે જ તેમણે સુશિક્ષિત બેરોજગાર માટે પણ એક સંગઠન બનાવીને તેમને મદદ કરવાની મુહિમ ઉપાડી.
ત્યાર બાદ એક પ્લોટને લગતી સમસ્યા ઉકેલીને કલ્પનાએ બિલ્ડરના ક્ષેત્રમાં ઝંપલાવ્યું. એ સમયે તેમની સુરક્ષા માટે પણ જોખમ ઉભું થયું અને ત્યારે તેમણે પોલીસ કમિશનર પાસેથી પોતાની સુરક્ષા માટે રિવોલ્વર લાયસન્સ લીધું.
ત્યાર બાદ તેમણે દેવાળું ફૂંકી ચુકેલી કમાણી ટ્યુબ્સ નામની કંપનીની ધુરા સાંભળી. આ ભારતની એકમાત્ર એવી કંપની હતી જેની માલિકી સુપ્રીમ કોર્ટે એના કામદારોને હસ્તક કરી હતી.
2000 થી 2006 સુધીમાં કલ્પનાના કુશળ નેતૃત્વ હેઠળ કોર્ટમાં તેઓ કેસ જીતી ગયા અને 116 કરોડના દેવાના દંડ અને વ્યાજને સફળતાપૂર્વક નાણામંત્રીની સાથે વાતચીત કરીને માફ કરાવી દીધું. કર્મચારીઓના બાકી પગારને 3 વર્ષમાં ચૂકવવાના ફરમાન સામે કલ્પનાએ ફક્ત 3 મહિનામાં આ પગાર ચૂકવીને કર્મચારીઓની દુઆઓ મેળવી.
આજે કલ્પના સરોજની કંપનીના નામ પરથી મુંબઈ શહેરમાં બે સડકના નામ છે. દેશની તમામ મહિલાઓ માટે કલ્પના સરોજ નિઃશંક પણે એક સોનેરી દ્રષ્ટાંત છે કે સ્ત્રી સાચે જ ધારે એ સફળતાના શિખરો પર કરી શકવાની શક્તિ ધરાવે છે.