બિનસચિવાલય ક્લાર્કની પરીક્ષામાં ગેરરીતિ મામલે ઉમેદવારો ગઈકાલથી ગાંધીનગરમાં ધરણા પર છે. બુધવારે પરીક્ષાર્થીઓએ ગાંધીનગર ગજવ્યું હતું. આખો દિવસ ઉમેદવારોનો વિરોધ યથાવત્ રહ્યો. પોલીસ દ્વારા ઉમેદવારોને ડીટેઈન પણ કરવામાં આવ્યાં હતાં. ગાંધીનગરમાં બિનસચિવાલય ક્લાર્ક પરીક્ષાનાં વિદ્યાર્થીઓ ધરણા પર બેઠા છે. જ્યાં સુધી પરીક્ષા રદ્દ કરવામાં ન આવે ત્યાં સુધી તે ત્યાંથી નહીં હટે તેવી ચીમકી ઉગારી છે ત્યારે સોશિયલ મીડિયામાં પણ બિનસચિવાલયનો મુદ્દો ખુબ ટ્રેન્ડ થઇ રહ્યો છે. ગઈકાલથી જ ટ્વિટર પર બિનસચિવાલયને લગતાં હેશટેગ ટ્રેન્ડ કરી રહ્યાં છે. હજારો લોકો સોશિયલ મીડિયાના માધ્યમથી ઉમેદવારોનો સાથ આપી રહ્યાં છે.
ટ્વિટર #saveGujratstudents પર બે લાખથી વધુ ટ્વિટ
લોકોએ બિનસચિવાલય પરીક્ષા મુદ્દે વિવિધ પોસ્ટ શેર કરી
આખી રાત ગાંધીનગરમાં ઉમેદવારોનો હલ્લાબોલ
સંજય રાવલ સમજાવવા આવ્યાં પરંતુ ઉમેદવારો ન માન્યાં
સાંજનાં સમયે મોટીવેશનલ સ્પીકર સંજય રાવલ આવી પહોંચ્યાં અને વિદ્યાર્થીઓને આવેદન કરવા માટે સમજાવ્યું પરંતુ વિદ્યાર્થીઓ ન માન્યાં. પરીક્ષા રદ્દ નહીં તો સરકાર રદ્દનાં નારા સાથે વિદ્યાથીઓએ આંદોલન ચાલુ રાખ્યું. સરકારની બેઠકમાં નિર્ણય લેવાયો કે અત્યારે વિદ્યાર્થીઓ સાથે કોઈ જ પ્રકારની વાટાઘાટ કરવામાં આવશે નહીં. આખી રાત વિદ્યાર્થીઓ આ જ પ્રકારે ગાંધીનગરમાં જ રહ્યા ત્યારે સરકારનું મૌન યથાવત્ રહ્યું.
ગુજરાતનાં ઘણા બધા લોકોએ ટ્વિટ્ કરીને પ્રતિક્રિયાઓ આપી
સોશિયલ મીડિયામાં પણ બિનસચિવાલયનો મુદ્દે હજારો લોકોએ રોષ ઠાલવ્યો હતો. દિવસભર બિનસચિવાલય મુદ્દે હેશ ટેગ ખુબ ટ્રેન્ડ કરી રહ્યાં હતા. બુધવારે બપોરથી ટ્વિટર પર #saveGujratstudents ટ્રેન્ડ કરી રહ્યું છે. જેમાં અત્યાર સુધી 2 લાખથી વધુ ટ્વિટ્સ થયાં છે. ગુજરાતનાં ઘણા બધા લોકોએ ટ્વિટ્ કરીને પ્રતિક્રિયાઓ આપી છે. ટ્વિટર યુઝર્સે અડગ વિદ્યાર્થીઓનો સાથ આપવાની વાત સ્વીકારી હતી. સોશિયલ મીડિયામાં સરકારનો વિરોધ કરતી પોસ્ટ ખુબ શેર કરવામાં આવી હતી.