બિન સચિવાલયની પરીક્ષામાં થયેલી ગેરરીતિ મામલે કોંગ્રેસ દ્વારા બે સ્કૂલના CCTV જાહેર કરવામાં આવ્યા છે. ત્યારે હવે આ મામલે ભાજપના પ્રવક્તા પ્રશાંત વાળાએ નિવેદન આપ્યુ છે કે, સમગ્ર મામલે તપાસ કર્યા બાદ પગલા લેવામાં આવશે. વિદ્યાર્થીઓના હિતમાં સરકાર દ્વારા પગલા લેવામાં આવશે.
બિન સચિવાલય કૌભાંડ મામલો
ભાજપના પ્રવક્તાનું નિવેદન
સમગ્ર મામલે તપાસ કર્યા બાદ લેવાશે પગલા
આ મુદ્દે કોંગ્રેસને બોલવાનો કોઈ અધિકાર નથી. કોંગ્રેસના શાસનમાં રૂપિયાથી જ કામ થતા હતા. રૂપિયા આપ્યા વગર કોઈને સરકાર નોકરી મળતી ન હતી. ત્યારે હવે કોંગ્રેસ દ્વારા આક્ષેપ કરવામાં આવ્યા છે અને CCTV જાહેર કરવામાં આવ્યા છે. કોંગ્રેસે જાહેર કરેલા CCTV અંગે તપાસ કરવામાં આવશે. આ CCTV ક્યાના છે તે અંગે સરકાર દ્વારા તપાસ કરાશે.
ગૌણ સેવા પસંદગીના અધ્યક્ષનું મૌન
બિનસચિવાલયની પરીક્ષામાં ગેરરીતિના કોંગ્રેસે વીડિયો જાહેર કર્યા છે. આ મામલે મીડિયા દ્વારા ગૌણ સેવા પસંદગીના અધ્યક્ષને ફોન કરવામાં આવ્યો હતો. જોકે અધ્યક્ષ અસિત વોરા મિટીંગમાં વ્યસ્ત હોય તેવુ જણાવવામાં આવ્યુ હતું. ત્યારે વીટીવીની ટીમ અસિત વોરાની ઓફિસમાં પહોંચી હતી. આ દરમિયાન અસિત વોરા પોતાની ઓફિસમાં જોવા મળ્યા હતા. કોંગ્રેસ દ્વારા ખુલાસા કરવામાં આવતા અસિત વોરા મીડિયાના સવાલથી ભાગી રહ્યા છે.
અધિકારીઓ જવાબ નથી આપી રહ્યા
CCTVમાં ગેરરીતિ દેખાઈ રહી હોવા છતા કોઈ જવાબ આપવામાં આવ્યો ન હતો. પોતાની એસીની ઓફિસમાં હોવા છતા અધિકારીઓ જવાબ આપવા માટે તૈયાર નથી. ત્યારે હવે સરકાર સામે પણ અનેક સવાલ ઉઠી રહ્યા છે.
શું સરકારી અધિકારીઓ જ મામલાને દબાવવા માગે છે. આ પ્રકારના અનેક સવાલ ઉઠી રહ્યા છે. લાખો ઉમેદવારોના ભવિષ્ય જ્યારે ખતરામાં છે તેમ છતા ગૌણ સેવા પસંદગીના અધ્યક્ષ પોતાની ઓફિસમાં આરામ કરી રહ્યા છે.
શું બની ઘટના ?
ગુજરાત કોંગ્રેસની યુવાટીમે સુરેન્દ્રનગર જિલ્લાના વઢવાણ શહેરના એસ.એન વિદ્યાલય ખાતે અપાયેલા સેન્ટર પર ગેરરિતી થયાનાં આક્ષેપ બાદ CCTV પણ જાહેર કર્યા છે. રાજ્યના લાખો વિદ્યાર્થીઓએ 17 નવેમ્બરના રોજ બિનસચિવાલય ક્લાર્કની પરીક્ષા આપી હતી જેમાં આ ગેરરીતિ સામે આવી છે. કોંગ્રેસે મીડિયા સાથે CCTVમા પુરાવા જાહેર કરી સરકાર અને ગુજરાત ગૌણ સેવા પસંદગી મંડળનું કૌભાંડ બહાર પાડ્યું છે.