બિલિયનર લિસ્ટ / અદાણીને નુક્સાન તો અંબાણીની વધી ગઈ કમાણી, 24 જ કલાકમાં ખંખેરી નાખ્યા આટલા હજાર કરોડ રૂપિયા, ટોપ 10માં એન્ટ્રી

• અદાણી સ્પર્ધામાંથી આઉટ થતાં અંબાણીએ મારી એન્ટ્રી
• અરબોપતિઓની લિસ્ટમાં 9માં સ્થાને અંબાણી 
• અદાણીનાં શેરોમાં થઈ રહ્યો છે સતત ઘટાડો

ગૌતમ અદાણી અને હિંડનબર્ગ રિસર્ચનો મામલો સામે આવ્યાં બાદ દરરોજ અરબોપતિઓની લિસ્ટમાં ફેરફાર થતો જોવા મળી રહ્યો છે ત્યારે ગૌતમ અદાણી ટોપ-20માંથી બહાર થયાં તેની સામે ભારતનાં બીજા સૌથી મોટાં ઉદ્યોગપતિ મુકેશ અંબાણી ટોપ-10માં એન્ટ્રી મારી રહ્યાં છે. 

ટોપ-10માં ફરી અંબાણીની એન્ટ્રી
રિલાયન્સ ઈન્ડસ્ટ્રીઝનાં ચેરમેન અને એશિયાનાં સૌથી અમીર વ્યક્તિ મુકેશ અંબાણી આ સપ્તાહનાં પહેલા જ દિવસે સોમવારે ફોર્બ્સની ટોપ-10 બિલેનિયર્સ લિસ્ટમાં 12માં સ્થાને પહોંચ્યાં હતાં પરંતુ છેલ્લા 24 કલાકમાં તેમની કંપનીનાં શેરોની કિંમતમાં ઉછાળો આવતાં તેઓ 9માં સ્થાને આવ્યાં છે. હવે તેમની સંપત્તિ આશરે 28 હજાર કરોડ રૂપિયા જેટલો ફાયદો નોંધાયો છે.

9માં સ્થાને અંબાણી
ફોર્બ્સ રિયલ ટાઈમ બિલેનિયર્સ ઈન્ડેક્સ અનુસાર સંપત્તિમાં થયેલા આ વધારાને લીધે મુકેશ અંબાણીની નેટવર્થ વધીને હવે 85.4 અરબ ડોલર થઈ ગયેલ છે અને આ જ આંકડાની સાથે તેઓ ફરી દુનિયાનાં ટોપ-10 અમીરોની લિસ્ટમાં 9માં સ્થાને સ્થિર થયાં છે.

અદાણી ટોપ-20ની પણ બહાર
હિંડનબર્ગના રિપોર્ટને લીધે ભારતીય અરબોપતિ ગૌતમ અદાણીને સતત નુક્સાન ભોગવવું પડી રહ્યું છે. અદાણી ગ્રુપને લઈને 24 જાન્યુઆરી 2023નાં પબ્લિશ થયેલી રિપોર્ટ બાદથી અદાણીનાં શેરોમાં ઘટાડો જોવા મળી રહ્યો છે અને દરરોજ તેમના સ્ટોક્સમાં લોઅર સર્કિટ જ નજરે આવી રહ્યું છે. હાલમાં ગૌતમ અદાણીની સંપત્તિ 52.2 અરબ ડોલર છે અને અરબોપતિઓની લિસ્ટમાં તે 24માં સ્થાને છે. છેલ્લાં 24 કલાકમાં અદાણીને 17,392 કરોડ રૂપિયાનું નુક્સાન ભોગવવું પડ્યું છે.