બિકીની પહેરીને પર્વતો પર ચઢવા માટે જાણીતી યુવતી આ વખતે પરત ન ફરી થયું મોત

તાઈવાનની એક યુવતી હતી જેને પર્વતોથી ઘણો પ્રેમ હતો. પર્વતો પર ચઢવું ટ્રૅકિંગ કરવું ખૂબ પસંદ હતું અને તે પણ બિકીની પહેરીને. આ જ રીતે તે 11 જાન્યુઆરીએ ટ્રૅકિંગ કરીને પર્વતો પર ગઈ અને પછી પરત ફરી જ નહીં. 

બિકીની પહેરીને હાઇકિંગ માટે દુનિયાભરમાં જાણીતી હતી ગિગી વૂ. ગિગીને વૂ ચી-યૂંના નામથી પણ લોકો ઓળખતા હતા. આ વખતે ફરીથી તે એક પર્વત પર ગઈ હતી. બિકીની હાઈકર 11 જાન્યુઆરીના રોજ એકલી પર્વતો તરફ ગઈ હતી. પર્વતોમાં જ ક્યાંક તે ઘાયલ થઈ હતી. ગમે તેમ કરીને તેણે 19 જાન્યુઆરીના રોજ સેટેલાઈટ ફોનથી મિત્રોને કૉલ કર્યો અને કહ્યું કે હું તકલીફમાં છું. ઇજા થવાને કારણે હું ચાલી નથી શકતી તેથી મારી મદદ કરો. 

ત્યાર બાદ નેશનલ ઍરબોર્ન સર્વિસના ગ્રુપે રૅસ્ક્યુ માટે બ્લૅક હૅલિકૉપ્ટર મોકલ્યું અને તે પણ એક વખત નહીં પરંતુ ત્રણ-ત્રણ વખત. પરંતુ વાતાવરણ ખરાબ હોવાને કારણે હૅલિકૉપ્ટર લૅન્ડ કરી શક્યું ન હતું. તાપમાન 2 ડિગ્રી સૅલ્સિયસની આસપાસ હતું અને ત્યાર બાદ તેને શોધવા માટે ત્રણ લોકોની બે અલગ-અલગ ટીમ બનાવવામાં આવી હતી. બંને ટીમો 28 કલાક સુધી તેને શોધતી રહી અને અંતમાં જે મળ્યું તે ગિગીની લાશ હતી. ઠંડીને કારણે તેની બૉડી લગભગ જામી ગઈ હતી. ઘણી શોધખોળ બાદ તેની ડેડ બૉડી 21 જાન્યુઆરી તાઈવાનના નૅશનલ પાર્કમાં મળી હતી. 

શોધ કરનાર ટીમના કમાન્ડરે જણાવ્યું કે ગિગીની બૉડી સમુદ્ર તળેટીથી લગભગ 1700 મીટર (5577 ફૂટ) ઉપર મળી હતી. 

36 વર્ષીય ગિગીને અગાઉ પણ પર્વતો પર ઘણી ઇજાઓ થઈ હતી અને ગંભીરરૂપથી ઘાયલ પણ થઈ હતી. ક્રિસમસ 2018 વખતે ગિગીએ પોતે સોશ્યલ મીડિયા પર ફોટો પોસ્ટ કરતાં લખ્યું હતું કે "થૅન્ક ગોડ હું બચી ગઈ છું"

પરંતુ આ વખતે બિકીની હાઈકર બીચ ન શકી. ગિગી પોતાના ઇન્સ્ટાગ્રામ પેજ પર જે ફોટો પોસ્ટ કરતી હતી તેમાં તે કેટલાંય હાઈએસ્ટ પૉઇન્ટ પર રહેતી હતી. તે જણાવતી હતી કે હું વર્ષના 127 દિવસ હાઈકિંગને આપું છું.