ચોમાસામાં વરસાદી ખાડાથી ખરેખર ચેતવા જેવું છે. મહારાષ્ટ્રના થાણેમાં રસ્તા વચ્ચેના ભુવમાં પડેલા એક બાઈકસવારનું બસની ટક્કરથી મોત થયું હતું.
મહારાષ્ટ્રમાં થાણે જિલ્લામાં ભુવો બન્યો મોતનું કારણ
ભારે વરસાદને પગલે બાઈકસવાર વરસાદી ખાડામાં ખાબક્યો
ઊભો થઈને બહાર આવ્યો તેટલામાં બસ યમદુત બનીને આવી
નીચે કચડાઈ જતા થયું મોત
'ચોમાસામાં રસ્તા વચ્ચે પડેલા મસમોટા ભુવા મોતનું કારણ બની રહ્યાં છે અને તેથી લોકોએ હવે આ ભુવાથી ચેતવા જેવું છે. બાઈકસવારોએ તો ખાસ ધ્યાન રાખવાની જરુર છે. મહારાષ્ટ્રના થાણેમાં ઘોડબંદર રોડ પર એક ખાડા સાથે અથડાયા બાદ મોટરસાઇકલ પરથી નીચે પટકાતાં એક વ્યક્તિને બસે અડફેટે લીધો હતો અને તેનું મોત થયું હતું. આ ઘટના મંગળવારે બપોરે બની હતી જ્યારે 37 વર્ષીય બાઇક ચાલક એક ખાડા સાથે અથડાયા બાદ સંતુલન ગુમાવી બેઠો હતો અને મોટરસાયકલ પરથી નીચે પડી ગયો હતો. પાછળથી આવી રહેલી બસે તેને કચડીને મોતને ઘાટ ઉતારી દીધો હતો.
સ્થાનિકોએ મોત માટે ભુવાને જવાબદાર ઠેરવ્યો
પોલીસે જણાવ્યું હતું કે તેઓએ બસના ચાલક સામે ગુનો નોંધ્યો છે અને તપાસ ચાલુ છે.જોકે સ્થાનિક લોકોએ તેના મોત માટે આ ખાડાને જવાબદાર ઠેરવ્યો હતો. તેમનો દાવો છે કે છેલ્લા કેટલાક દિવસોથી આ વિસ્તારમાં અવિરત વરસાદને પગલે રસ્તાના પટમાં અનેક ખાડાઓ પડી ગયા છે.
મહારાષ્ટ્રમાં સોમવારથી ભારે વરસાદ
મહારાષ્ટ્રમાં સોમવારથી ભારે વરસાદ જોવા મળી રહ્યો છે અને કેટલીક નદીઓના જળસ્તરમાં ઝડપથી વધારો થઈ રહ્યો છે. હવામાન વિભાગે રાયગઢ, રત્નાગિરી અને કેટલાક અન્ય જિલ્લાઓ માટે આગામી કેટલાક દિવસોમાં ખૂબ જ ભારેથી અતિ ભારે વરસાદની આગાહી કરતા 'રેડ' અને 'ઓરેન્જ' ચેતવણીઓ જારી કરી છે. મુખ્ય પ્રધાન એકનાથ શિંદેએ મંગળવારે રાજ્યના વહીવટી અધિકારીઓને જરૂરી સાવચેતી રાખવા અને એ સુનિશ્ચિત કરવા નિર્દેશ આપ્યો હતો કે કોઈ જાનહાનિ ન થાય કે સંપત્તિને નુકસાન ન થાય.
ચોમાસામાં રસ્તા પર પડેલા વરસાદી ખાડાથી સાવધાન
બાઈકસવારોએ રસ્તા પર પડેલા વરસાદી ખાડાથી સાવધાન રહેવાની જરુર છે. ભારે વરસાદને કારણે રસ્તાઓ ઉખડી જતા હોય છે અને તેને કારણે મોટા મોટા ભુવા પડતા હોય છે જે ગમે ત્યારે મોતનું કારણ બની શકે છે.