બિહારના લખીસરાય જિલ્લામાં ગત મોડી રાતે એક લગ્નની ઉજવણી માતમમાં ફેરવાઈ ગઈ હતી. લખીસરાયમાં હલસી પોલીસ સ્ટેશન વિસ્તારમાં આવેલા હલસી બજારમાં એક ભયંકર દુર્ઘટના બની હતી. બેફામ ઝડપે આવતી એક ટ્રક લગ્ન સમારંભમાં ઘૂસી જતાં એક બાળકી સહિત કુલ આઠ લોકોનાં કચડાઈ જવાથી મોત થયાં છે.
આ દુર્ઘટનામાં અનેક લોકોને ગંભીર ઈજાઓ પણ થઈ છે અને હાલ આ તમામ લોકો હોસ્પિટલમાં સારવાર હેઠળ છે. ઘટના બાદ રોષે ભરાયેલા લોકોએ હલસી બજારમાં આવેલા આંબેડકર ચોક ખાતે એકઠા થઈને ટ્રાફિકજામ કરી દીધો હતો અને વળતરની માગણી સાથે રોડ પર જોરદાર હોબાળો કરી નારાજગી વ્યક્ત કરી હતી.
હાલ એસપી મનીષકુમાર, એસડીએમ મુરલીપ્રસાદ સિંહ અને પોલીસના અન્ય ઉચ્ચ અધિકારીઓ ઘટનાસ્થળે પહોંચીને લોકોને સમજાવવાની કોશિશ કરી રહ્યા છે. બેકાબુ સ્થિતિને ધ્યાનમાં રાખીને વધારાની પોલીસ ફોર્સ પણ તહેનાત કરી દેવામાં આવી છે.
સૂત્રોના જણાવ્યા અનુસાર, હલસી બજાર ખાતે રહેતા નકટ માંઝીની પૌત્રીના લગ્નનો આ સમારંભ હતો. જાન ગઢી વિશનપુર ગામથી આવી હતી. ઘટના બની ત્યારે જાનૈયાઓ અને કન્યા પક્ષના લોકો ભોજન લેવા જઈ રહ્યા હતા. કેટલાક લોકો રોડ ક્રોસ કરીને નવવધૂના ઘરે પહોંચી ગયા હતા, જ્યારે બાકીના લોકો રસ્તાના કિનારે બનેલી ઝૂંપડીમાં બેઠા બેઠા જમી રહ્યા હતા. એ જ વખતે માતેલા સાંઢની જેમ ધસમસતી ટ્રક લખીસરાય તરફથી આવી હતી અને વીજળીનો થાંભલો તોડીને ટ્રક જાનૈયાઓ ઉપર ફરી વળી હતી.
ઝૂંપડીની અંદર ભોજન લઈ રહેલા સાત લોકોના ટ્રક નીચે કચડાઈને ઘટનાસ્થળે જ મોત નિપજ્યાં હતાં. વર પક્ષના ત્રણ અને કન્યા પક્ષના પાંચ લોકોએ જીવ ગુમાવ્યો હોવાની વાત સામે આવી છે. મૃતકોમાં મુસ્કાન નામની માસૂમ બાળકીનો પણ સમાવેશ થાય છે. ગંભીર રીતે ઘવાયેલી મુસ્કાનને જ્યારે હોસ્પિટલ લઈ જવામાં આવી રહી હતી ત્યારે રસ્તામાં જ તે મૃત્યુ પામી હતી.
મૃતકોમાં મંજિતકુમાર, નકટ માંઝી, મુસ્કાન કુમારી, ઉમેશ માંઝી, રાજીવ માંઝી, ધનરાજ માંઝી, શંભુ માંઝી અને ગોરે માંઝીનો સમાવેશ થાય છે. ગંભીર રીતે ઘવાયેલા લોકોને લખીસરાય સદર હોસ્પિટલ અને હલસી પીએચસીમાં દાખલ કરવામાં આવ્યા છે.
ઘટના બાદ ટ્રક ચાલક તેની ટ્રક છોડીને નાસી છૂટ્યો હતો અને પોલીસ હાલ તેની શોધખોળ કરી રહી છે. દુર્ઘટના બાદ રોષે ભરાયેલા લોકોએ લખીસરાય-સિકંદરા રોડ બ્લોક કરી દીધો હતો અને તમામ વાહનો અટકાવી દીધાં હતાં. એસડીઓ મુરલીપ્રસાદે જણાવ્યું કે, ટ્રક જપ્ત કરી લેવામાં આવી છે. ટ્રકના રજિસ્ટ્રેશન નંબરના આધારે તેના માલિક અને ડ્રાઈવરની ઓળખ થઈ ગઈ છે અને ડ્રાઈવરની ટૂંક સમયમાં જ ધરપકડ કરવામાં આવશે.