દેશમાં કોરોના વાયરસના હાહાકારને પગલે લૉકડાઉન લાદવામાં આવ્યું છે, તો બીજી તરફ શ્રમિકો રોજગારી નહીં મળતા પોતાના માદરે વતન તરફ જવા માટે મરણીયા પ્રયાસ કરી રહ્યા છે ત્યારે એક કાળજું કંપાવનારી ઘટના બિહારના મુજ્જફનગર રેલવે સ્ટેશન પર બની હતી.
કોરોના સંકટ વચ્ચે જોવા મળ્યું દર્દનાક દ્રશ્ય
માતાનું ભૂખ-તરસના લીધે સ્ટેશન પર જ થયું મોત
માતાના કફન સાથે બાળકને રમતા જોઇ સર્જાયા ભાવુક દ્રશ્યો
ભીષણ ગરમી અને ભૂખથી બેહાલ થયેલી એક મહિલાએ રેલવે સ્ટેશન પર જ દમ તોડ્યો હતો અને તેનું નાનું બાળક તેની માતા પર ઓઢાડવામાં આવેલ કફન હટાવવાનો પ્રયાસ કરી રહ્યું હતું. આ ઘટના જોનારની આંખોમાં આંસુ છલકાઇ ઉઠ્યા હતા.
ગુજરાતથી ટ્રેનમાં બેસીને બિહાર પહોંચી હતી આ મહિલા
સોશિયલ મીડિયા પર શેર કરવામાં આવી રહેલી ક્લિપમાં, જોઇ શકાય છે કે મહિલા જમીન પર પડેલી છે અને તેને કપડાથી ઢાંકવામાં આવી છે પરંતુ તેનું બાળક તેના 'કફન' સાથે રમી રહ્યો છે અને તેને દૂર કરવાનો પ્રયાસ કરી રહ્યો છે, પરંતુ બાળકની કાલીઘેલી રમત છતાં તેની માતા કાઇ સાંભળતી નથી. કારણ કે જાણીતું છે કે મહિલાનું મૃત્યુ તીવ્ર ગરમી, ભૂખ અને ડિહાઇડ્રેશનને કારણે થયું હતું. મહિલા મજૂર ટ્રેન દ્વારા મુઝફ્ફરપુર પહોંચી હતી.
માતાના કફન સાથે રમતા બાળકને જોઇને સૌ કોઇ થયાં ભાવુક
મહિલાના પરિવારજનોએ જણાવ્યું કે, ટ્રેનમાં કાઇ ખાવા-પીવાનું નહીં મળતા આ મહિલાની તબિયત ખરાબ થઇ હતી. તેણી શનિવારે ગુજરાતથી ટ્રેનમાં સવાર થઇને સોમવારે મુજફ્ફરપુર આવી પહોંચી અને થોડા જ સમયગાળામાં સ્ટેશન પર જ તેનું મોત નિપજ્યું હતું. જો કે, આ અંગે હજી સુધી કોઇ પુષ્ટી થઇ નથી. તેણીનું શબ સ્ટેશન પર જ પડ્યું હોવાથી તેનું બાળક તેને વારંવાર જગાડવાનો પ્રયાસ કરી રહ્યું ત્યારે આ ઘટનાને જોઇને પ્લેટફોર્મ પરથી પસાર થતાં લોકો જોઇને ભાવુક થયા હતા. અંતે એક બાળકે તેને ત્યાંથી હટાવ્યો હતો.
આ સિવાય અઢી વર્ષના એક બાળકનું સ્ટેશન પર થયું મોત
આ સિવાય મુજફ્ફરપુર સ્ટેશન પર એક અઢી વર્ષના બાળકનું માતાની ગોદમાં જ મોત થયું હતું. મૃતક બાળકના પરિવારજનોનુ કહેવું છે કે, ભીષણ ગરમીને કારણે અને ટ્રેનમાં ખાણી-પીણી નહીં મળવાને કારણે બાળકની તબિયત બગડી અને સ્ટેશન આવતા જ બાળકે દમ તોડી દીધો હતો.