શરમજનક / શિક્ષણની ઘોર ખોદી: હું શાળાએ જાવ છું- આટલા વાક્યનું અંગ્રેજી પણ ન કરી શક્યા શાળાના આચાર્ય

• બિહારના મોતિહારીમાંથી એક ગજબનો કિસ્સો સામે આવ્યો
• અહીં શાળાના શિક્ષકો સામાન્ય વાક્યનું અંગ્રેજી પણ ન કરી શક્યા
• બિહારના શિક્ષણ વ્યવસ્થાની આચાર્યએ જ પોલ ખોલી નાખી

બિહારના મોતિહારી જિલ્લામાંથી એક સરકારી શાળાના આચાર્યએ શિક્ષણ વ્યવસ્થાની પોલ ખોલીને મુકી દીધી છે. હેડમાસ્ટરજી કેમેરાની સામે 'હું શાળાએ જાવ છું' 'હું વિદ્યાલય જઈ રહ્યો છું' આટલા વાક્યનું અંગ્રેજીમાં અનુવાદ પણ ન આવડ્યું અને નીરિક્ષણ કરવા પહોંચેલા એસડીઓની સામે ફાંફા મારવા લાગ્યા હતા. તો વળી શાળાના વધુ એક ટીચરને જળવાયું અને મૌસમની વચ્ચેનો તફાવત પણ નથી ખબર. ત્યારે હવે આ ઘટનાનો વીડિયો સોશિયલ મીડિયા પર વાયરલ થઈ રહ્યો છે. 

એસડીઓ અચાનક નિરીક્ષણ કરવા પહોંચ્યા, પોલ ખુલી

જિલ્લાના પકડીદયાલ પ્રખંડ વિસ્તારમાં આવેલી સરકારી શાળાનો આ કિસ્સો છે. હકીકતમાં જોઈએ તો, એસડીઓ રવિન્દ્ર કુમાર હાલમાં નીરિક્ષણ કરવા માટે પહોંચ્યા હતા. આ દરમિયાન ચેતા પંચાયતની ઉત્ક્રમિત મધ્ય વિદ્યાલયમાં ગયા અને ડાયરેક્ટ ક્લાસમાં જઈને ઊભા રહ્યા હતા. 

એસડીઓએ ક્લારૂમાં બાળકોને ભણાવી રહેલા સહાયક શિક્ષક મુકુલ કુમારને અમુક સવાલો પૂછ્યા કે, જળવાયુ, મૌસમ અને પર્યાવરણ વચ્ચે શું અંતર છે. જેનો યોગ્ય જવાબ આપી શક્યા નહોતા. ત્યાર બાદ ખુદ એસડીઓએ બ્લેકબોર્ડ પર લખીને ટીચર સહિત બાળકોને સરળ ભાષામાં વિસ્તાર પુર્વક આ ત્રણેય બાબત વિશે જણાવ્યુ હતું.

હેડમાસ્ટર સામાન્ય વાક્યનો પણ જવાબ ન આપી શક્યા

ત્યાર બાદ SDO રવિન્દ્ર કુમારે શાળાના હેડમાસ્ટર વિશ્વનાથ રામના રૂમમાં પહોંચ્યા અને પૂછ્યું આપ ક્યા વિષયના શિક્ષક છો, જવાબમાં હેડમાસ્ટરે કહ્યું કે, હું અંગ્રેજી અને સંસ્કૃત ભણાવું છું.

આ સાંભળીને એસડીઓએ હેડમાસ્ટરને સવાલ કર્યો કે, હું શાળાએ જાવ છુંનું આપ અંગ્રેજી અને સંસ્કૃત અનુવાદ કરીને બતાવો. જેનો જવાબ ખોટો મળ્યો. બાદમાં અધિકારીએ કહ્યું કે, ચલો હું શાળાએ જઈ રહ્યો છું,નું ટ્રાંસલેટ કરો. પણ હેડમાસ્ટર જી ન તો અંગ્રેજી કે ન સંસ્કૃત એકેયમાં અનુવાદ કરી શક્યા નહીં. 

સ્કૂલનું નિરીક્ષણ કર્યા બાદ પત્રકારો સાથે વાત કરતા એસડીઓ રવિન્દ્ર કુમારે કહ્યું કે, શિક્ષકોએ બાળકોને ભણાવતા પહેલા ઘરેથી પોતે શિખીને આવવું જોઈએ. શિક્ષકોની અભ્યાસ કરવાની આદત છૂટી ગઈ છે. ત્યારે આવા સમયે શિક્ષણ વિભાગે સમય સમય પર શિક્ષકોને ટ્રેનિંગ આપવી જોઈએ.