બિહારના કાર્યક્રમમાં કોંગ્રેસે કર્યા અલ્પેશ ઠાકોર સાઇડલાઇન

ગુજરાતમાં ઉત્તર ભારતીયો પર થયેલા હુમલા માટે ઉશ્કેરણી કરવાના આરોપનો સામનો કરી રહેલા અલ્પેશ ઠાકોરે કોંગ્રેસને બિહારના થનારા કાર્યક્રમ માટે આમંત્રણ નથી અપાયું. અલ્પેશ ઠાકોર સહ-પ્રભારી પણ છે અને તેઓ રાહુલ ગાંધીના કરીબી પણ ગણાય છે. તેમ છતાંય અલ્પેશની બિહારમાં થનારા કાર્યક્રમમાંથી બાદબાકી કરવામાં આવી છે. 

પટણામાં એક પ્રેસ કોન્ફરન્સમાં બિહાર કોંગ્રેસના પ્રમુખ મદન મોહવ ઝા અને કેમ્પેઇન કમિટિના ચેરમેન અખિલેશ પ્રસાદ સિંહે જણાવ્યુ કે 21 ઓક્ટોબરના થનારા કાર્યક્રમમા પક્ષના ટોચના નેતાઓ તેમજ સાથી પક્ષના આગેવાન પણ હાજર રહેશે. જોકે તેમને જ્યારે પૂછવામાં આવ્યું કે અલ્પેશ ઠાકોર આ કાર્યક્રમ આવશે કે નહી? ત્યારે તેમણે જણાવ્યુ હતુ કે અલ્પેશ ઠાકોરને નિમંત્રણ નથી મોકલાયું.

અલ્પેશ ઠાકોરને નિમંત્રણ ન મોકલવા પાછળ ગુજરાતમાં તાજેતરમાં બિહારના લોકો પર થયેલા હુમલાની ઘટના જવાબદાર છે કે કેમ તે અંગે કોંગ્રેસે કોઇ સ્પષ્ટતા નહોતી કરી. પક્ષના નેતાઓએ જણાવ્યું હતું કે બિહારના ઈન-ચાર્જ બન્યા બાદ અલ્પેશ ઠાકોર એક જ વખત અહીં આવ્યા છે. જોકે ગુજરાતમાં ઉત્તર ભારતીયો સામે હિંસા બદલ પક્ષે ભાજપ સરકારને જ દોષિત ગણાવી હતી. 

બિહાર કોંગ્રેસે એવું પણ સ્પષ્ટ કર્યું હતું કે ક્રિશ્ના સિંહના જન્મદિનની ઉજવણીમાં શક્તિસિંહ ગોહિલ પણ હાજર નહીં રહે તેવા અહેવાલ ખોટા છે. શક્તિસિંહ તેમજ આર જે ડીના નેતા તેજસ્વી યાદવ તેમાં હાજરી આપશે. બિહારના પહેલા સીએમ ક્રિશ્ના સિંહ ભૂમિહર સમુદાયના હતા અને તેમનું 1961મા અવસાન થયું હતું. તેમના જન્મદિવસની ઉજવણીથી કોંગ્રેસના ભૂમિહર જેવી ઉચ્ચવર્ગની વોટબેંકને પોતાના તરફ આકર્ષવા માગે છે.