ગુજરાતના ભારતીય જનતા પાર્ટીના પ્રદેશ પ્રમુખ સી.આર પાટીલે અલ્પેશ ઠાકોરના ચૂંટણી લડવાના સંકેત આપ્યા છે. તેમણે જણાવ્યું કે, અલ્પેશ ઠાકોર ચૂંટણી લડશે અને જીતશે એવો અમને વિશ્વાસ છે
ગુજરાત વિધાનસભાની ચૂંટણીના પડઘમ શરૂ થઈ ચૂક્યા છે અને દરેક રાજકીય પાર્ટીએ હવે ચૂંટણીની તૈયારી શરૂ કરી દીધી છે. ગુજરાત વિધાનસભાની ચૂંટણી જેમ-જેમ નજીક આવી રહી છે તેમ તેમ દિગ્ગજ નેતાઓની સક્રિયતા પણ વધી છે. તેવામાં વિધાનસભાની ચૂંટણીને લઇને મહત્વના સમાચાર સામે આવી રહ્યાં છે. ગુજરાતના ભારતીય જનતા પાર્ટીના પ્રદેશ પ્રમુખ સી.આર પાટીલે અલ્પેશ ઠાકોરના ચૂંટણી લડવાના સંકેત આપ્યા છે.
અલ્પેશભાઈ અમારા સિનિયર આગેવાન છેઃ પાટીલ
સી.આર.પાટીલે અલ્પેશ ઠાકોર ચૂંટણી લડે અને જીતે તેવી શુભકામનાઓ પણ પાઠવી છે. સી.આર.પાટીલે જણાવ્યું કે, 'અલ્પેશભાઈ અમારા સિનિયર આગેવાન છે, તેઓ ચૂંટણી લડે અને સીટ પર વિજયી થાય એવી શુભેચ્છાઓ આપીએ છીએ. દરેક પોત-પોતાના મત વિસ્તારમાં તૈયારીઓ કરતા હોય છે, અલ્પેશ ઠાકોર ચૂંટણી લડશે અને જીતશે એવો અમને વિશ્વાસ છે.' આ ઉપરાંત તેમણે જણાવ્યું કે, ટિકિટ આપવાનો નિર્ણય હાઈકમાન્ડ દ્વારા કરવામાં આવશે.
મારે અહીંયાથી પરણવું છે, પરણાવવાની જવાબદારી તમારીઃ અલ્પેશ ઠાકોર
અલ્પેશ ઠાકોર માટે આ એક સારો સંકેત કહી શકાય કારણ કે અલ્પેશ ઠાકોરે તાજેતરમાં રાધનપુરમાં યોજાયેલા બનાસડેરીની મહિલા જાગૃતિ કાર્યક્રમમાં જણાવ્યું હતું કે, 'મારે અહીંયાથી પરણવું છે, પરણાવવાની જવાબદારી તમારી છે.' આ બધાની વચ્ચે સી.આર પાટીલનું આ નિવેદન ઘણું બધુ કહી જાય છે.
મહિલા જાગૃતિ કાર્યક્રમમાં અલ્પેશ ઠાકોરે જણાવ્યું હતું કે, 'મારે અહીંયાથી પરણવું છે, પરણાવવાની જવાબદારી તમારી છે. જાન રંગેચંગે જોડાય અને તમે મુરતિયાને પરણાવો એવી વિનંતી કરું છું. મારાથી ભૂલચૂક થઇ હોય ક્યાય મનદુઃખ થયું હોય તો તમામ આગેવાનો મને માફ કરજો.'
શંકર ચૌધરીએ અલ્પેશ ઠાકોરની ચૂંટણી લડવાના આપ્યા હતા સંકેત
તો શંકર ચૌધરીએ જણાવ્યું હતું કે, અલ્પેશ ઠાકોર ગઈ વખતે જાન લઈને આવ્યા, જાન માંડવે પહોંચી અને બાકી રહી ગયું છે.હવે આવુ અધૂરું ના રહે એ જોજો જરાં, તમારા બધાની જવાબદારી છે.