ટેલિવિઝનનો સૌથી વિવાદિત રિયાલાટી શો ‘બિગ બોસ 13’ છેલ્લા કેટલાક સમયથી ફરી ચર્ચામાં છે. મેકર્સ આ શોની વધતી જતી લોકપ્રિયતાને જોઈને એપિસોડ વધારવાનું વિચારી રહ્યા હતા. જો કે, હાલમાં મળેલી જાણકારી પ્રમાણે મેકર્સે આ પ્લાન રદ્દ કરી દીધો છે.
મેકર્સનું પ્લાન કેન્સલ કરવા પાછળનું કારણ સલમાન ખાનની વ્યસ્તતા માનવામાં આવી રહી છે. આ કારણે શોનો ફિનાલે આવતા મહિને થઈ શકે છે.
શો સાથે સંકળાયેલ વ્યક્તિએ જણાવ્યું કે, મેકર્સ અમુક અઠવાડિયાં માટે શોને હજુ વધારે લંબાવવા માગતા હતા. કારણ કે ગયા વખતની સીઝન કરતાં આ વખતે સારું રેટિંગ અને રિસ્પોન્સ મળી રહ્યો છે. પરંતુ એક્ટર-હોસ્ટ સલમાન ખાન પોતાની ફિલ્મ કભી ઈદ કભી દિવાલીના પ્રિ-પ્રોડક્શનમાં ઘણો વ્યસ્ત છે. જેને કારણે તે એક્સટેન્ડ કરેલ એપિસોડને હોસ્ટ નહીં કરી શકે. આ જાણીને શો ના મેકર્સે એપિસોડ વધારવાનો પ્લાન કેન્સલ કરી દીધો છે.
આ સીઝનને પહેલેથી જ 5 અઠવાડિયાં માટે લંબાવી ચૂકાઈ છે. 29 સપ્ટેમ્બરે બિગ બોસ 13ની શરૂઆત 13 કન્ટેસ્ટન્ટ્સ સાથે થઈ હતી. જાન્યુઆરીમાં શોનો ફિનાલે થવાનો હતો, જે હવે 15 ફેબ્રુઆરીએ થાય તેવી સંભાવના છે. જો આ ગણતરીએ જોવા જઈએ તો 140 દિવસનો સમયગાળો અત્યાર સુધીનો સૌથી વધારે છે. એટલું જ નહીં પણ આ એકમાત્ર એવી સીઝન છે કે, જેમાં 12 વાઈલ્ડકાર્ડ કન્ટેસ્ટન્ટ એન્ટ્રી લઈ ચૂક્યા છે.