રાજકોટના ગોંડલની મેંગણી પોસ્ટ ઓફિસમાં મસમોટા કૌભાંડનો પર્દાફાશ થતાં ખળભળાટ મચી ગયો છે. પોસ્ટ ઓફિસના કર્મચારીઓ દ્વારા બચત ખાતામાં દૈનિક વ્યવહારોમાં ગરબડ કરી ઠગાઈ આચરવામાં આવતા ગાંધીનગર સીબીઆઈમાં ફરિયાદ દાખલ કરવામાં આવી છે. આ મામલે CBIએ 13 લોકો વિરુદ્ધ ગુનો નોંધ્યો છે.
ગોંડલ પોસ્ટ ઓફિસના અધિકારીએ નોંધાવી ફરિયાદ
રાજકોટ ગોંડલ ડિવિઝનલ પોસ્ટ ઓફિસ હેઠળ આવતી મેંગણી પોસ્ટ ઓફિસમાં 9.97 કરોડની ઠગાઈ આચરવામાં આવી છે. જેની ગોંડલ નોર્થ ડિવિઝનલ પોસ્ટ ઓફિસના અધિકારીએ યશવંત જોશી, હેમાંગ વ્યાસ, કાંતિલાલ ટાંક સહિત 13 લોકો સામે ફરિયાદ નોંધાવી છે.
CBIએ 13 લોકો સામે તપાસ શરૂ કરી
બચતખાતા અને દૈનિક વ્યવહારોમાં ગડબડ કરીને 9,97,80,064 રૂપિયાની ઠગાઈ આચરવામાં આવી હોવાની ફરિયાદ ગાંધીનગર CBIમાં નોંધાઈ છે. CBIએ 13 લોકો સામે ગુનો નોંધી તપાસ શરૂ કરી છે.
બચત ખાતામાં દૈનિક વ્યવહારોમાં ગડબડ કરી ગુનો આચર્યો
ફરિયાદ અનુસાર, મેંગણી પોસ્ટ ઓફિસ દ્વારા જરૂરી વાઉચરો એકાઉન્ટ ઓફિસ ગોંડલ ખાતે મોકલવામાં આવતા નહોતા. તો પોસ્ટ ઓફિસની રોકડ રકમ પણ પોતાની પાસે જ રાખવામાં આવતી હતી. આ પોસ્ટ ઓફિસમાં કામ કરતા કર્મચારીઓના પરિવારના સભ્યો અને ગ્રામીણ ડાક સેવકોના સેવિંગ એકાઉન્ટમાં ટ્રાન્સફર કરીને કુલ 9.97 કરોડનું કૌભાંડ આચરવામાં આવ્યું છે.
કપડવંજ તાલુકામાંથી સામે આવ્યો હતો આવો જ બનાવ
અત્રે ઉલ્લેખનીય છે કે, થોડા મહિના અગાઉ ખેડા જિલ્લામાંથી પણ આવું જ કૌભાંડ સામે આવ્યું હતું. કપડવંજ તાલુકાના તોરણા ગામમાં પોસ્ટ માસ્તર તરીકે ફરજ બજાવતા રમીઝ મહંમદસફી શેખ અને મોહમ્મદ ઇકરામ સલીમભાઈ શેખે દ્વારા પોસ્ટ ગ્રાહકોના ખોટા દસ્તાવેજ અને ખોટી સહીઓ કરી રૂ. 1.13 કરોડનું ફૂલેકું ફેરવ્યું હતું.
પોસ્ટ માસ્તરે આચર્યું હતું કરોડોનું કૌભાંડ
ડાક નિરીક્ષક દીપકભાઈ પ્રજાપતિ દ્વારા બંન્ને આરોપીઓ વિરુદ્ધ ફરિયાદ કરાતાં સપ્ટેમ્બર 2021થી મે 2022 સુધી પોસ્ટ ખાતાના જુદા-જુદા ગ્રાહકોના ખાતામાંથી કાયમી ઉચાપત તેમજ હંગામી ઉચાપત કરી તેમજ ગેરરીતિ આચરી કુલ 1,13,00,912ની નાણાકીય ઉચાપત કરી હોવાનું બહાર આવ્યું હતું. જેની કપડવંજ રૂરલ પોલીસે બન્ને આરોપી વિરુદ્ધ ફરિયાદ નોંધી વધુ તપાસ હાથ ધરી હતી.