કથિત હનીટ્રેપની ઘટનામાં કરાઈ એકેડમીએ તપાસનો રિપોર્ટ તૈયાર કરી એડમિન સુજાતા મજમુદારે ડીજીપી આશિષ ભાટીયાને રિપોર્ટ સોંપ્યો
કથિત હની ટ્રેપકાંડમાં યુવતી ઇન્દોરની નહી પરંતુ ગુજરાતની જ હોવાનો થયો ખુલાસો
યુવતિનો ફોટો વાયરલ મામલે થયો મોટો ખુલાસો
ફોટો કરાઇ એકેડમીનો નહી માઉન્ટ આબુનો હોવાનુ સામે આવ્યુ
પોલીસે બંધ બારણે યુવતીના નિવેદનો લીધા હોવાનું પણ સામે આવ્યું
ગુજરાતમાં કથિત હનીટ્રેપમાં IPSની સંડોવણીનો મામલે હવે એક મોટા સમાચાર સામે આવ્યા છે. વાત જાણે એમ છે કે, કથિત હનીટ્રેપની ઘટનામાં હવે કરાઈ એકેડમીએ તપાસનો રિપોર્ટ તૈયાર કરી લીધો છે. જેમાં કથિત હનીટ્રેપની ઘટનામાં યુવતી મધ્યપ્રદેશના ઈન્દૌરની નહીં પણ ગુજરાતની હોવાનો ઉલ્લેખ થયો છે. આ સાથે પોલીસે બંધ બારણે યુવતીના નિવેદનો લીધા હોવાનું પણ સામે આવ્યું છે.
કરાઇ પોલીસ એકેડેમીના IPS અધિકારીના કથિત હનીટ્રેપની ઘટનામાં મોટો ખુલાસો થયો છે. વિગતો મુજબ કથિત હનીટ્રેપની ઘટનામાં યુવતી મધ્યપ્રદેશના ઈન્દૌરની નહીં પણ ગુજરાતની હોવાનો ઉલ્લેખ થયો છે. આ સાથે યુવતીની મોંઘીદાટ કાર પણ ગુજરાત પાસિંગની હોવાનું અને વાયરલ ફોટો ગુજરાતનો નહીં પણ આબુનો હોવાનું ખુલ્યુ છે.
કથિત હની ટ્રેપકાંડનો મામલો
કરાઈ એકેડમીએ તપાસનો રિપોર્ટ તૈયાર કર્યો તેમાં ફોટો કરાઇ એકેડમીનો નહી માઉન્ટ આબુનો હોવાનુ સામે આવ્યુ છે. વિગતો મુજબ કરાઇ માં આ યુવતી ઘોડેસવારી શીખવા નહી પરંતુ બહેન બનેવી સાથે મુલાકાત માટે આવી હતી. જ્યાં કરાઇ એકેડમીમાં પરિવાર સાથે ફોટો પડાવ્યા હતા. તપાસ મુજબ ફોટો થી વિરુધ્ધ સામાન્ય દેખાવ ધરાવતી આ યુવતી સાથે અન્ય ઓફિસરોના નામ જોડવા પાછળ કાવતરું હોવાનું પણ ખૂલ્યું છે. જેને લઈ હવે કરાઇ એકેડમીના એડમિન સુજાતા મજમુદારે ડીજીપી આશિષ ભાટીયાને રિપોર્ટ સોંપ્યો છે. આ સાથે હનીટ્રેપ મુદ્દે હજુ વધુ તપાસ હાથ ધરાઈ છે. આ સાથે હવે શંકાસ્પદોના કોલ ડીટેઇલ્સની તપાસ થઇ શકે છે.
શું છે સમગ્ર ઘટના ?
ગુજરાતના કરાઇ પોલીસ એકેડેમી ખાતે એક યુવતીએ આઇપીએસ અધિકારીને હનીટ્રેપમાં ફસાવીને એક કરોડ રૂપિયા જેટલી રકમમાં સેટલમેન્ટ કરી હોવાની કથિત ચર્ચા જામી હતી. કથિત ચર્ચા મુજબ કરાઇ પોલીસ તાલીમ એકેડમીમાં ઘોડેસવારી શીખવા આવનાર ઇન્દોરની યુવતીએ આઇપીએસ અધિકારીને હનીટ્રેપમાં ફસાવીને એક કરોડની રકમ સમાધાન માટે લીધા હોવાની ચર્ચા હતી. આ સાથે યુવતીએ એક નહી પણ અન્ય પોલીસ અધિકારીઓને ટારગેટ કરાયાનું પણ ચર્ચામાં આવતા ગૃહવિભાગે શુક્રવારે હનીટ્રેપ મામલે તપાસ કરવા માટેના આદેશ આપ્યા હતા. જોકે આ મામલે હવે કરાઈ એકેડમીએ તપાસનો રિપોર્ટ તૈયાર કરી લીધો છે. જે બાદમાં કરાઇ એકેડમીના એડમિન સુજાતા મજમુદારે ડીજીપી આશિષ ભાટીયાને રિપોર્ટ સોંપ્યો છે. આ સાથે હનીટ્રેપ મુદ્દે હજુ વધુ તપાસ હાથ ધરાઈ છે.