અમદાવાદ ક્રાઇમબ્રાંચે ઝડપેલા પાકિસ્તાની જાસૂસની પૂછપરછમાં ચોંકાવનારા ખુલાસા થયા છે. જાસૂસ અબ્દુલ વહાબ અત્યાર સુધીમાં 5 વખત પાકિસ્તાન ગયો હોવાનું સામે આવ્યું છે.
અમદાવાદ ક્રાઇમબ્રાંચે ઝડપેલા પાકિસ્તાની જાસૂસનો મામલો
અબ્દુલ વહાબ 5 વખત પાકિસ્તાન ગયો હોવાનું આવ્યું સામે
વર્ષ 2019માં કરાંચીમાં 3 દિવસ લીધી હતી ટ્રેનિંગ
પાકિસ્તાની જાસૂસી સંસ્થા સાથે સંકળાયેલા અમદાવાદના કાલુપુર વિસ્તારમાં રહેતા અબ્દુલ વહાબ નામના શખ્સની ક્રાઈમબ્રાંચે ધરપકડ કરી હતી. દેખાવમાં વૃદ્ધ અને લાચાર જેવો દેખાતો 72 વર્ષીય અબ્દુલ વહાબ દેશવિરોધી માહિતી પાકિસ્તાન ઈન્ટેલિજન્સને મોકલતો હતો. તેની પૂછપરછમાં જે વિગતો બહાર આવી, તે જાણીને ક્રાઈમબ્રાંચની પણ પગ નીચેથી જમીન સરકી ગઈ.
અત્યાર સુધીમાં 16 જેટલા સીમકાર્ડ કરાવી ચૂક્યો છે એક્ટિવ
પાકિસ્તાની જાસૂસની પૂછપરછમાં મોટો ઘટસ્પોટ થયો છે. પૂછપરછમાં સામે આવ્યું છે કે, અત્યાર સુધીમાં તે અમદાવાદના લોકોના ડોક્યુમેન્ટના આધારે 16 જેટલા સીમકાર્ડ એક્ટિવ કરાવી ચૂક્યો છે. આ શખ્સ ભારતીય સીમકાર્ડ્સ કોઈપણ રીતે પાકિસ્તાન પહોંચાડતો હતો અને આ સીમકાર્ડનો ઉપયોગ પાકિસ્તાની જાસુસી સંસ્થાઓ જાસુસી કરવા માટે કરતી હતી. સીમકાર્ડની મદદથી પાકિસ્તાની જાસુસો વોટ્સએપ ગ્રુપ એક્ટિવ કરતા હતા. આ સિમકાર્ડ પર એક્ટિવેટ વોટ્સએપ પરથી જ પાકિસ્તાની હેકર્સ સેનાના જવાનોને મેસેજ અને વોઈસ કોલ કરતા હતા.
અત્યાર સુધીમાં 13 જેટલા લોકોને મોકલી ચૂક્યો છે પાકિસ્તાન
72 વર્ષીય અબ્દુલ વહાબ શેરમહંમદ પઠાણની પૂછપરછમાં એવું પણ સામે આવ્યું છે કે, તે સરકારી વેબસાઈટ જેવી ક્લોન વેબસાઈટ બનાવીને સેનાના નિવૃત જવાનો અને સિનિયર અધિકારીઓની માહિતી એકઠી કરીને પાકિસ્તાન મોકલતો હતો. ભારત-પાકિસ્તાનના ભાગલા સમયે પોતાના પરિવારથી અલગ પડેલો આ વ્યક્તિ અત્યાર સુધીમાં 5 વખત પાકિસ્તાન ગયો, પરંતુ ત્યાં પરિવારને મળવાની જગ્યાએ પાકિસ્તાની એજન્ટોનો જાસૂસ બની ગયો. અત્યાર સુધીમાં તે 13 જેટલા લોકોને પાકિસ્તાન મોકલી ચૂક્યો છે. તપાસમાં એવું પણ સામે આવ્યું છે કે તેણે વર્ષ 2019માં કરાંચીમાં 3 દિવસ જસૂસીની ટ્રેનિંગ પણ લીધી હતી.
ક્રાઈમબ્રાંચે વધુ તપાસ હાથ ધરી
પાકિસ્તાની ગુપ્તચર એજન્સી ISIના હેકર્સે વોટ્સએપ એક્ટિવેટ સિમકાર્ડની મદદથી અસંખ્ય સેનાના જવાનો અને અધિકારીઓના મોબાઈલ નંબર અને તેમનો પર્સનલ ડેટા મેળવી લીધો છે. આ ઉપરાંત દેશની કેટલીક અતિ મહત્વની વિગતો પણ દુશ્મન દેશ પાસે પહોંચી ગઈ છે. જે દેશ માટે ખૂબ જ જોખમી બાબત છે. આ પાકિસ્તાની જાસૂસ અબ્દુલ સાથે કોણ-કોણ સંડોવાયેલા છે અને તેણે કોના-કોના નામ પર સિમકાર્ડ લીધા છે તે મામલે તપાસ હાથ ધરી છે. આ ઉપરાંત ક્રાઈમ બ્રાંચે શંકાસ્પદ લોકોની અટકાયત કરીને પૂછપરછ શરૂ કરી છે.