એંધાણ / મોટા સમાચાર: ફરી યોજાશે વાયબ્રન્ટ સમિટ? ટૂંક સમયમાં સરકાર લઈ શકે છે મહત્વનો નિર્ણય

• વાઈબ્રન્ટ  ગુજરાત મે મહિનામાં યોજાઈ શકે છે 
• પહેલી મે એ ગુજરાત રાજ્યનો સ્થાપના દિવસ 
• આયોજન પૂર્વે કોવિડની સ્થિતિની સમીક્ષા થશે 

રાજ્યમાંવાયબ્રન્ટ ગુજરાત ગ્લોબલ સમિટ યોજાવાના એંધાણ મળી રહ્યા છે. જાન્યુઆરી -2022માં ત્રિ દિવસીય સમિટ નિર્ધારિત દિવસોના માત્ર ચાર દિવસ પહેલા જ મોકૂફ રાખવામાં આવી હતી. ડીસેમ્બર-2021ના અંતથી કોરોના સંક્રામણે ગુજરાતમાં ફરી એકવાર માથું ઊંચકવાનું  શરુ કર્યું હતું. રાજ્ય સરકારના બહુ આયામી આયોજન દરમિયાન એમ લાગ્યું હતું કે, સંક્રમણની સ્થિતિ સમગ્ર આયોજન પર કોઈ અવળી અસર નહિ કરે. આમ છતાં, રાજ્ય સરકારે એક વાર કેન્દ્ર સરકારનું આ આયોજન બાબતે માર્ગદર્શન મેળવ્યું હતું. અને કેન્દ્ર સરકારે દેશ અને રાજ્યની તત્કાલીન સ્થિતિ જોતા ,સમગ્ર આયોજન મોકૂફ રાખવા સૂચવતા વાઈબ્રન્ટ મોકૂફ રહ્યો હતો. 

રાજ્ય સ્થાપના દિવસનું આયોજન 

હવે જ્યારે વાઈબ્રન્ટ ગુજરાત ફરી યોજાવાના એંધાણ મળી રહ્યા છે ત્યારે, આ સમિટ હવે ગુજરાત રાજ્યના સ્થાપના દિવસ  1 મેથી ત્રણ દિવસ માટે યોજાઈ શકે છે. ઉલ્લેખનીય છે કે, નવા આયોજનમાં પણ પહેલા કોવિડ-19ની સ્થિતિની સમીક્ષા કરાશે અને ત્યાર બાદ અંતિમ નિર્ણય લેવામાં આવશે.  

કેન્દ્રનું માર્ગદર્શન લેવાશે 

જાન્યુઆરી-2022ના 10થી 12 જાન્યુઆરી દરમિયાન ગાંધીનગરમાં વાઈબ્રન્ટ ગુજરાત ગ્લોબલ  સમિટનું આયોજન કરાયું હતું. પરંતુ તત્કાલ સ્થિતિને ધ્યાનમાં રાખી મોકૂફ કરાયેલું આ આયોજન હવે પહેલી મે દરમિયાન થઇ શકે છે. આ આયોજન માટે પણ કેન્દ્ર સરકારનું અવશ્ય માર્ગદર્શન લેવામાં આવશે જ. સાથોસાથ કોરોના સંક્રમણની રાજ્ય અને કેન્દ્રની સ્થિતિની સમીક્ષા કરીને જ અંતિમ આયોજન થશે.