રાજકોટ / રાધેક્રિષ્ના સોસાયટી મર્ડર કેસ: બોલાચાલી કરી ધોકા અને પથ્થરોથી એકને પતાવી દીધો, CID સમક્ષ આરોપી ભુરો સરેન્ડર

• અવિનાશ ધુલેશિયા મર્ડર કેસમાં ભુરાનું સરેન્ડર
• પથ્થરમારામાં કારખાનેદાર પ્રૌઢની થઈ હતી હત્યા
• 6 આરોપીઓની થઈ ચૂકી છે ધરપકડ
• રાધેક્રિષ્ના સોસાયટી ખાલી કરાવવા મચાવ્યો હતો આતંક

રાજકોટના બહુચર્ચિત કેસમાં આજે વધુ એક આરોપીએ CID સમક્ષ સરેન્ડર કરી દીધું છે. રાધેક્રિષ્ના સોસાયટી મર્ડર કેસમાં અમિત ભાણવડીયા બાદ હવે ભરત સોસા ઉર્ફે ભુરાએ CID સમક્ષ સરેન્ડર કરી દીધું છે. સોસાયટીમાં ઘર ખાલી કરાવવા આરોપીઓએ માથાકૂટ કરી મારામારી કરતા સોસાયટીમાં રહેતા કારખાનેદાર અવિનાશ કુરજી ધુલેશિયાને માથામાં પથ્થર ઝીંકી મોતને ઘાટ ઉતાર્યા હતા. આ ગુનામાં ભરત સોસા ઉર્ફે ભુરો લાંબા સમયથી ફરાર હતો. 

મકાનો ખાલી કરાવવા ત્રાસ ગુજારતા હતા ભુમાફિયાઓ
કેસની વિગત મુજબ શહેરના યુનિ.રોડ પર આવેલી રાધાક્રિષ્ના સોસાયટીમાં મકાનો ખાલી કરાવવાના ઈરાદે ભુમાફિયાઓ વિસ્તારવાસીઓ પર ત્રાસ ગુજારતા હતા. રાધેક્રિષ્ના સોસાયટીમાં આવેલા 38માંથી 20 મકાન ભૂમાફિયાઓએ છેલ્લા ત્રણ વર્ષમાં ખાલી કરાવી નાખ્યા હતા, 18 પરિવારે મકાન વેચવાનો ઇનકાર કરતા છેલ્લા ઘણા મહિનાથી તેમના પર અસહ્ય ત્રાસ ગુજારવાનું શરૂ થયું હતું.

મોડી રાત્રે સોસાયટીમાં કર્યો હતો પથ્થરમારો
ગત વર્ષે 14 ફેબ્રુઆરીની મોડી રાત્રે રાધાકૃષ્ણ સોસાયટીમાં માથાભારે ટોળકીએ તરખાટ મચાવ્યો હતો. માથાભારે તત્ત્વોએ પથ્થરમારો કરતાં કારખાનેદાર અવિનાશભાઇ કુરજીભાઇ ધુલેશિયાને (ઉ.વ.52)ગંભીર ઈજા થયા હતા. જેથી તેમને સારવાર માટે હોસ્પિટલમાં ખસેડવામાં આવ્યા હતા. જ્યાં સારવાર દરમિયાન તેમનું મોત નીપજ્યું હતું. આ સમગ્ર ઘટના બાદ પોલીસ દોડતી થઈ હતી. પોલીસે હત્યાનો ગુનો નોંધી આરોપીઓને પકડવાની ચક્રોગતિમાન કર્યા હતા. 

ગૃહ રાજ્યમંત્રી હર્ષ સંઘવીએ આપી હતી બાંહેધરી
આ બનાવના શહેરભરમાં ચર્ચાનો વિષય બન્યો હતો. ભૂમાફિયાઓથી ત્રસ્ત રાધેક્રિષ્ના સોસાયટીના લોકો અને ધુલેશિયા પરિવારે યોગ્ય તપાસની ખાતરી મળે નહીં ત્યાં સુધી મૃતદેહ સ્વીકારવાનો ઇનકાર કરી દીધો હતો. ગૃહમંત્રી હર્ષ સંઘવીએ હત્યા કેસની તપાસ CID ક્રાઇમ કરશે તેવું ટ્વીટ કર્યું હતું, ગૃહ રાજ્યમંત્રીની જાહેરાતના 10 દિવસ બાદ ગૃહ વિભાગે CID ક્રાઇમ તપાસ કરશે તેવો લેખિત આદેશ કર્યો હતો. જે બાદ ટીમે આરોપી રવિ વાઢેર, વિજય રાઠોડ, હીરેન વાઢેર, પરેશ ચૌહાણની અને ત્યાર બાદ મયુરસિંહ જાડેજાની ધરપકડ કરી હતી. જ્યારે અમિત ભાણવડીયા અને ભરત સોસા ઉર્ફે ભુરો ફરાર થઈ ગયા હતા. 

અમિત બાદ ભૂરાએ કર્યું સરેન્ડર
ત્યારે ગત 20 જાન્યુઆરીએ રાધેક્રિષ્ના સોસાયટી મર્ડર કેસમાં ફરાર અમિત ભાણવડીયાએ કોર્ટમાં સરેન્ડર કર્યું હતું. અમિત ભાણવડીયાએ કોર્ટમાં સરેન્ડર કરતા સીઆઇડી ક્રાઇમની ટીમે તેને હસ્તગત કર્યો હતો. જે બાદ હવે ભરત સોસા ઉર્ફે ભુરાએ CID સમક્ષ સરેન્ડર કર્યું છે.