બેઠકમાં વિવાદ / ડિફેન્સ કમિટીની ચાલુ મીટિંગમાં રાહુલ ગાંધી સહિત નેતાઓ નીકળી ગયા બહાર, જાણો કારણ

• બુધવારે ડિફેન્સ કમિટીની બેઠક યોજાઈ
• રાહુલ ગાંધી LAC ના મુદ્દે ચર્ચા કરવા માગતા હતા
• કમિટીના ચેરમેને રાહુલની ચર્ચાની માંગ ઠુકરાવી દીધી
• નારાજ રાહુલ ગાંધી કોંગ્રેસ સાંસદો સાથે અધવચ્ચેથી બેઠક છોડી દીધી 

સૂત્રોના જણાવ્યાનુસાર રાહુલ ગાંધી અને કોંગ્રેસના બીજા સાંસદો લાઈન ઓફ એક્ચચ્યુઅલ કન્ટ્રોલ પર ચર્ચા કરવા માગતા હતા પરંતુ ચેરમેને તેની મંજૂરી આપી ન આપતા તેના વિરોધમાં રાહુલ સહિતના કોંગ્રેસી સાંસદોએ વોકઆઉટ કર્યો હતો. આ પહેલા ડિસેમ્બર 2020 માં પણ રાહુલ ગાંધી સાંસદો સાથે ડિફેન્સ કમિટીની બેઠક છોડીને નીકળી ગયા હતા. ત્યારે તેમણે આરોપ લગાવ્યો હતો કે સૈનિકોને કેવી રીતે સારુ સુવિધા આપવામાં આવે તેની ચર્ચા કરવાને બદલે યુનિફોર્મ પર ચર્ચા કરીને સમય બગાડવામાં આવી રહ્યો છે. બેઠકમાં સીડીએસ બિપિન રાવત પણ હાજર રહ્યાં હતા. 

મોદી સરકારે વિદેશ અને રક્ષા નીતિને રાજકીય હથકંડો બનાવીને દેશને નબળો પાડ્યો 

રાહુલ ગાંધીએ એવો આરોપ લગાવ્યો કે કેન્દ્ર સરકારે વિદેશ અને રક્ષા નીતિને રાજકીય હથકંડો બનાવીને દેશને નબળો પાડી દીધો છે. ચીની સેનાએ પૂર્વી લદ્દાખમાં ઘણા ઠેકાણે એલઓસી પાર કરી લીધી છે તેવી ખબરનું ઉદાહરણ આપતા રાહુલે કહ્યું કે મોદી સરકારે દેશને ઘણો નબળો બનાવી દીધો છે. 

રાહુલ ગાંધીએ કેમ વોકઆઉટ કરી દીધો

રાહુલ ગાંધી બેઠકમાં સરહદીય વિવાદોના મુદ્દે ચર્ચા કરવા માગતા હતા તેમણે સરકાર પાસેથી જવાબની પણ માગણી કરી હતી. પરંતુ કમિટીના અધ્યક્ષે રાહુલની આ માંગણી ફગાવી દીધી હતી જેને પરિણામે નારાજ બનેલા રાહુલ ગાંધીએ બેઠકમાંથી વોકઆઉટ કરી દીધો હતો.