PSI શ્વેતા જાડેજા દ્વારા લાંચ લેવાના કેસમાં કોર્ટના સમન્સ બાદ દેવેન્દ્ર ઓડેદરા હાજર થયો છે.
35 લાખ રૂપિયાનો તોડકાંડ કેસનો મામલો
મહિલા PSI શ્વેતા જાડેજાના બનેવીએ કોર્ટમાં કર્યું સરેન્ડર
આરોપી દેવેન્દ્ર ઓડેદરા સેસન્સ કોર્ટમાં થયો હાજર
અમદાવાદમાં લાંચના કેસમાં આરોપી PSI શ્વેતા જાડેજાના બનેવીએ કોર્ટમાં સરેન્ડર કર્યું છે. આરોપી દેવેન્દ્ર ઓડેદરા સેસન્સ કોર્ટમાં હાજર રહ્યો હતો. મહત્વનું છે કે, કોર્ટે આરોપીને ભાગેડું જાહેર કર્યો હતો. જે બાદ કોર્ટના સમન્સ પર દેવેન્દ્ર ઓડેદરા હાજર થયો હતો.
2017ના એક કેસમાં લાંચની કરી હતી માગણી
GSP ક્રોપ સાયન્સ પ્રાઈવેટ લિમિટેડ કંપનીના એમ.ડી. કેનાલ શાહ વિરુદ્ધ વર્ષ 2017માં મહિલા કર્મચારીએ દુષ્કર્મની ફરિયાદ નોંધાવી હતી. આ કેસની તપાસ મહિલા પશ્ચિમ પોલીસ સ્ટેશનના PSI શ્વેતા જાડેજાને સોંપવામાં આવી હતી. ત્યારબાદ મહિલા પોલીસ સ્ટેશનમાં જ પોલીસ સામે આ કેસમાં સાક્ષી બનેલા વ્યક્તિને ધમકાવવા મામલે કેનાલ શાહ વિરૂદ્ધ સેટેલાઈટમાં ફરિયાદ થઈ હતી. આમ બે અલગ અલગ કેસની ફરિયાદ નોંધાવવામાં આવી હતી.
જેમાં પીઆઈનો ચાર્જ ધરાવતાં PSI શ્વેતા જાડેજાએ રેપ કેસની તપાસમાં કેનાલ શાહને પાસા હેઠળ પૂરી દેવાનું જણાવી 35 લાખ રૂપિયાની માગણી કરી હતી. જેમાં તેમણે 20 લાખ ચૂકવી દેવાયા હતા પરંતુ 15 લાખ બાકી હતાં. આ માટે કેનાલ શાહે ક્રાઈમ બ્રાન્ચમાં અરજી કરી હતી. જે અંગે તપાસમાં પુરાવા મળતાં PSI શ્વેતા જાડેજા વિરુદ્ધ ફરિયાદ નોંધાઇ હતી.
અમદાવાદમાં સસ્પેન્ડ PSI શ્વેતા જાડેજા લાંચ મામલે SOGની તપાસમાં મોટો ખુલાસો થયો હતો. 35 લાખ સિવાય પણ રૂપિયા 10 લાખની વધુ લાંચનો ખુલાસો થયો હતો. જેમાં વધુ એક આંગડિયા પેઢી મારફતે 10 લાખ મોકલાવાયા હતાં. શ્વેતા જાડેજાએ બનેવી દેવેન્દ્ર ઓડેદરાને આ રૂપિયા મોકલ્યા હતાં. જે બાદ પોલીસે તેના બનેવી વિરુદ્ધ પણ ફરિયાદ નોંધી હતી. અને કોર્ટે તેને ભાગેડું જાહેર કર્યો હતો.