પીએસજીએ તાજેતરમાં કહ્યું કે તેની ટીમ ૧૯ જાન્યુઆરીએ રિયાધમાં રોનાલ્ડોની નવી ક્લબ અલ નાસર અને અલ હિલાલની સંયુક્ત ટીમ સામે ફ્રેન્ડલી મેચ રમશે.
સાઉદી અરબમાં રોનાલ્ડોની પ્રથમ મેચ મેસી સામે
૧૯ જાન્યુઆરીએ બે દિગ્ગજો ટકરાશે
પોર્ટુગલના સ્ટાર ફૂટબોલર ક્રિસ્ટિયાનો રોનાલ્ડો સાઉદી અરબમાં પોતાની પ્રથમ મેચ પેરિસ સેન્ટ જર્મેન (પીએસજી) સામે રમશે, જેમાં તેની સામે આર્જેન્ટિનાનો કટ્ટર હરીફ લિયોનેલ મેસી હશે. પીએસજીએ તાજેતરમાં કહ્યું કે તેની ટીમ ૧૯ જાન્યુઆરીએ રિયાધમાં રોનાલ્ડોની નવી ક્લબ અલ નાસર અને અલ હિલાલની સંયુક્ત ટીમ સામે ફ્રેન્ડલી મેચ રમશે. અલ નાસર તરફથી પોતાની પ્રથમ મેચ રમવા રોનાલ્ડોએ ૨૨ જાન્યુઆરી સુધી ઇંતેજાર કરવો પડશે, જ્યારે તેનો સામનો અલ ઇત્તિફાક સામે થશે.
વૈશ્વિક ફૂટબોલ નિયમો અનુસાર ૩૭ વર્ષીય રોનાલ્ડો બે મેચના સસ્પેન્શનની પોતાની સજા પૂરી કરશે. વિશ્વકપ પહેલાં ઇંગ્લિશ ફૂટબોલ ફેડરેશન દ્વારા નવેમ્બરમાં એક ચાહકનો ફોન ઝૂંટવીને ફેંકી દેવા બદલ રોનાલ્ડોને બે ક્લબ મેચના સસ્પેન્શનની સજા ફટકારાઈ હતી. પીએસજીની ટીમ બે દિવસ માટે સાઉદી અરબનો પ્રવાસ ખેડશે. પીએસજી ક્લબમાં સ્પોન્સર કતારના છે.
બેલ્જિયમના ભૂતપૂર્વ કોચ રોબર્ટો માર્ટિનેઝ હવે પોર્ટુગલના કોચ બની ગયા છે. આ પહેલાં ફર્નાન્ડો સાંતોસ હતા, જેમણે વિશ્વકપમાં મોરક્કો સામેની ક્વાર્ટર ફાઇનલમાં પોર્ટુગલની ટીમ બહાર થઈ જતાં કોચપદ છોડી દીધું હતું. સાંતોસે બે ફિફા વિશ્વકપની બે મેચમાં રોનાલ્ડોને બીજા હાફમાં મેદાનમાં ઉતાર્યો હતો. એવું માનવામાં આવી રહ્યું છે કે રોનાલ્ડોને બહાર બેસાડી રાખવામાં આવતાં પોર્ટુગલની ટીમ વિશ્વકપમાંથી બહાર થઈ ગઈ હતી. રોનાલ્ડો પણ કોચના આ નિર્ણયથી બહુ જ નારાજ થયો હતો.
રોબર્ટો માર્ટિનેઝે કહ્યું, ''હું દરેક ખેલાડી સાથે વાત કરીશ. શરૂઆત ગત વિશ્વકપના ૨૬ ખેલાડીઓથી કરીશ અને તેમાં રોનાલ્ડો પણ સામેલ છે. તે ૧૯ વર્ષથી પોર્ટુગલની ટીમમાં છે અને સન્માનનો હકદાર છે. બધા ખેલાડીને તક આપવી એ મારી જવાબદારી છે.''
ઉલ્લેખનીય છે કે વિશ્વકપમાં બેલ્જિયમની ટીમ ગ્રૂપ રાઉન્ડમાંથી બહાર થઈ ગયા બાદ માર્ટિનેઝે છ વર્ષથી ચાલી રહેલા કોન્ટ્રાક્ટને ખતમ કરી દીધો હતો. હવે તે પોર્ટુગલની ટીમ સાથે જોડાઈ ગયો છે, જેમાં બનાર્ડો સિલ્વા, બ્રૂનો ફર્નાન્ડીઝ અને જઓ ફેલિક્સ સામેલ છે.