રાજ્યમાં કાળજાળ ગરમી પડી રહી છે. ત્યારે હવે હવામાન વિભાગ દ્વારા વરસાદની આગાહી કરવામાં આવી છે. સૌરાષ્ટ્ર, કચ્છ, બનાસકાંઠામાં આજે વરસાદ પડે તેવી હવામાન વિભાગે આગાહી કરી છે.
દક્ષિણ રાજસ્થાનમાં સાયક્લોનિક સરક્યુલેશનથી વાતાવરણમાં પલટો આવ્યો છે. જેના કારણે હવામાન વિભાગ દ્વારા વરસાદની આગાહી કરવામાં આવી છે. રાજ્યમાં આગામી 2 દિવસ વરસાદની શક્યતાના કારણે પ્રજાને ગરમીથી રાહત મળશે.
અરવલ્લીમાં ઉડી ધૂળની ડમરીઓ
તો અરવલ્લીમાં પણ વાતાવરણમાં પલટો જોવા મળ્યો હતો. યાત્રાધામ શામળાજીમાં પણ આકાશ કાળા ડિબાંગ વાદળોથી ઘેરાયુ હતુ. તેમજ ઝડપથી ફૂંકાતા પવનને કારણે ધૂળની ડમરીઓ ઉડી હતી. જેને લઈને વાતાવરણમાં ઠંડક પ્રસરી હતી.
જો કે માવઠું થવાની શક્યતાને કારણે ખેડૂતોમાં ચિંતા જોવા મળી હતી. મહત્વનું છે કે, રાજકોટ અને અરવલ્લીમાં વાદળછાયુ વાતાવરણ જોવા મળતા ભર ઉનાળે લોકોને ગરમીથી રાહત મળી હતી.
અંબાજીમાં ધોધમાર
રાજ્યમાં સાઇક્લોનિક સર્ક્યુલેશનની અસરને લઈને અંબાજી સહિત આજુબાજુના વિસ્તારમાં વાતાવરણમાં પલટો જોવા મળ્યો હતો. ભારે ગરમી બાદ અંબાજીમાં ધોધમાર વરસાદ પડ્યો હતો. વરસાદના કારણે રોડ પર પાણી જ પાણી થઈ ગયુ હતુ. મળતી માહિતી મુજબ દાંતા અને કોટેશ્વરમાં પણ વરસાદ પડ્યો હતો.