ICC ચેમ્પિયન્સ ટ્રોફી 2025 / ચેમ્પિયન્સ ટ્રોફીને લઈ મોટા સમાચાર, પાકિસ્તાન નહીં જાય ભારતીય ટીમ, 'હાઈબ્રિડ મોડલ' પર યોજાશે ટુર્નામેન્ટ

ICC ચેમ્પિયન્સ ટ્રોફી 2025ને લઈને એક મોટા સમાચાર સામે આવ્યા છે. ICCએ 'હાઇબ્રિડ મોડલ' પર ચેમ્પિયન્સ ટ્રોફી 2025 યોજવાની મંજૂરી આપી છે. હવે આ ટુર્નામેન્ટ પાકિસ્તાન અને દુબઈમાં યોજાશે. આ અંગે ભારતીય ક્રિકેટ કંટ્રોલ બોર્ડ અને પાકિસ્તાન ક્રિકેટ બોર્ડ વચ્ચે પણ સમજૂતી થઈ છે. હવે ભારતીય ટીમ ચેમ્પિયન્સ ટ્રોફી 2025માં તેની તમામ મેચો દુબઈમાં રમશે. જ્યારે બાકીની ટુર્નામેન્ટ પાકિસ્તાનમાં યોજાશે.

BCCI અને PCB બંને સૈદ્ધાંતિક રીતે સંમત થયા છે કે પાકિસ્તાન T20 વર્લ્ડ કપ 2026માં લીગ મેચો માટે ભારતનો પ્રવાસ નહીં કરે. પાકિસ્તાન આ મેચ કોલંબોમાં રમશે. હાઇબ્રિડ મોડલ પર ચેમ્પિયન્સ ટ્રોફીનું આયોજન કરવાને કારણે PCBને કોઈ વળતર નહીં મળે. પરંતુ તે 2027 પછી કોઈપણ ICC મહિલા ટૂર્નામેન્ટનું આયોજન કરશે.

તમને જણાવી દઈએ કે ભારત સરકારે આ ટૂર્નામેન્ટ માટે ભારતીય ટીમને પાકિસ્તાન મોકલવાની મંજૂરી આપી ન હતી. આવી સ્થિતિમાં 'હાઇબ્રિડ મોડલ' જ એકમાત્ર વિકલ્પ હતો. બીસીસીઆઈએ આ નિર્ણય અંગે આઈસીસીને પત્ર લખીને જાણ કરી હતી. જોકે પીસીબીએ આઈસીસીની બેઠકમાં ભારપૂર્વક જણાવ્યું હતું કે તે 'હાઈબ્રિડ મોડલ' હેઠળ ટુર્નામેન્ટનું આયોજન કરવા ઈચ્છુક નથી, પરંતુ તેનું વલણ નરમ પડ્યું છે.

આ પણ વાંચોઃ મુંબઈ ઈન્ડિયન્સે IPL 2025 માટે નવો ફિલ્ડ કોચ શોધ્યો, 2 વર્લ્ડ જિતાડનારને સોંપી જવાબદારી

1996 વર્લ્ડ કપ પછી પાકિસ્તાનની આ પ્રથમ ICC ઇવેન્ટ છે, જ્યારે ભારત અને પાકિસ્તાન પણ આ ઇવેન્ટના સહ-યજમાન હતા. ભારત અને પાકિસ્તાને 2012 થી દ્વિપક્ષીય શ્રેણી રમી નથી, પરંતુ તેઓ ગયા વર્ષે ભારતમાં યોજાયેલા ODI વર્લ્ડ કપ સહિત ICC ટૂર્નામેન્ટમાં એકબીજાનો સામનો કરી ચૂક્યા છે. ગયા વર્ષે, ભારતે પાકિસ્તાનમાં રમવાનો ઇનકાર કર્યા પછી પાકિસ્તાન દ્વારા આયોજિત એશિયા કપને પણ 'હાઈબ્રિડ મોડલ'માં બદલવામાં આવ્યો હતો. ત્યારબાદ ભારતે તેની તમામ મેચ શ્રીલંકામાં રમી હતી.

બધાજ સમાચાર અને અપડેટ્સ મેળવવા માટે પ્લેસ્ટોર/ એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ