રાજકોટ મહાનગર પાલિકાએ રાજકોટમાં 45 જગ્યાએ શહેરી કલીનીક યોજના અમલી બનાવવાનું ઠરાવી દીધું છે. આ અંતર્ગત રાજકોટમાં હવે શેરી-ગલીએ ફ્રીમાં લોકોને સારવાર મળશે.
રાજકોટમાં શનિવારથી શેરી ક્લિનિક
શ્રમિકો,સફાઈ કર્મીઓ,અશક્તો લાભાર્થી
શેરી-ગલીમાં મળી રહેશે તબીબી સારવાર
દિલ્હીમાં મુખ્યમંત્રી અરવિંદ કેજરીવાલે શરુ કરેલા મહોલ્લા કલીનીકની સફળતા-નિષ્ફળતા અંગે ભલે તર્ક-વિતર્ક થતા હોય પણ રાજકોટ મહાનગર પાલિકાએ રાજકોટમાં 45 જગ્યાએ શહેરી કલીનીક યોજના અમલી બનાવવાનું ઠરાવી દીધું છે. આ અંતર્ગત રાજકોટમાં હવે શેરી-ગલીએ ફ્રીમાં લોકોને સારવાર મળશે. ખાસ કરીને શ્રમિકો,સફાઈ કામદારો અને અશક્ત નાગરીકોને હવે હોસ્પિટલ કે દવાખાને ના જવું પડે તેવો આશય છે
45 જગ્યાએ દીનદયાલ ઔષધાલય
રાજકોટ શહેરના વિવિધ સ્લમ વિસ્તાર સહિતના 45 સ્થળોએ "દીનદયાલ ઔષધાલય"નો શુભારંભ કરવામાં આવશે. આ અગાઉ મુખ્યમંત્રીએ રાજ્યમાં "દીનદયાલ ઔષધાલય"નો શુભારંભ કરાવેલ તેના અનુસંધાને રાજકોટ મહાનગરપાલિકા દ્વારા પણ વિવિધ સ્લમનાં જરૂરિયાતમંદ નાગરિકોને તબીબી સેવાઓ વિનામૂલ્યે ઉપલબ્ધ બનાવવા આ પ્રકલ્પ અમલમાં મુકવામાં આવી રહયો છે.
મહાનુભાવો રહેશે ઉપસ્થિત
આ અવસરે સાંસદ મોહનભાઈ કુંડારિયા, રામભાઈ મોકરીયા, ગુજરાત મ્યુનિ. ફાઈનાન્સ બોર્ડ ચેરમેન ધનસુખભાઈ ભંડેરી, શહેર ભાજપ પ્રમુખ કમલેશભાઈ મીરાણી,શહેર ભાજપ પ્રદેશ અગ્રણી નીતિનભાઈ ભારદ્વાજ, પ્રદેશ ભાજપ મંત્રી બિનાબેન આચાર્ય, ધારાસભ્ય ગોવિંદભાઈ પટેલ, લાખાભાઈ સાગઠીયા, પ્રદેશ ભાજપ બક્ષી પંચ મોરચાના અધ્યક્ષ ઉદયભાઈ કાનગડ, રાજકોટ શહેર ભાજપ મહિલા મોરચાના પ્રભારી અંજલિબેન રૂપાણી, ડેપ્યુટી મેયર ડૉ. દર્શિતાબેન શાહ, કોર્પોરેટર અને પૂર્વ ધારાસભ્ય ભાનુબેન બાબરીયા, શહેર ભાજપ મહામંત્રી જીતુભાઈ કોઠારી, કિશોરભાઈ રાઠોડ તેમજ શાસક પક્ષનાં નેતા વિનુભાઈ ઘવા, વિરોધ પક્ષનાં નેતા ભાનુબેન સોરાણી, શાસક પક્ષનાં દંડક સુરેન્દ્રસિંહ વાળા ઉપસ્થિત રહેશે.
સેવાસેતુનો પણ લાભ મળશે
લોકોને જુદી જુદી યોજનાઓ માટે જુદા જુદા વિભાગોમાં ધક્કા ખાવા ન પડે તે હેતુથી સેવા સેતુમા પોતાના જ વિસ્તારમાં ઉકેલી શકાય તેવા પ્રશ્નોનો સ્થળ ઉપર જ તે દિવશે જ નિકાલ થશે એટલે કે, લોકોના ઘર આંગણે જ તંત્ર ઉપસ્થિત રહી પ્રશ્નોનો નિકાલ કરશે. સાથોસાથ સ્લમ્સમાં શરૂ થઇ રહેલ "દીનદયાલ ઔષધાલય"ની તબીબી સેવાઓનો લાભ લે તેવી સ્ટેન્ડિંગ કમિટીના ચેરમેન પુષ્કરભાઇ પટેલ, મ્યુનિ. કમિશનર અમિત અરોરા અને આરોગ્ય કમિટીનાં ચેરમેન ડો. રાજેશ્રીબેન ડોડિયાએ અનુરોધ કર્યો છે.