BIG NEWS / ગાંજા'કિંગ' ઝડપાયો: ઓડિશામાં ગુજરાત પોલીસે ચલાવ્યું મોટું ઓપરેશન, 3500 કિલો ગાંજો મોકલવાનો આરોપ

• સુરત ક્રાઈમ બ્રાંચ દ્વારા ઓડિશામાં ગાંજા માફિયા વિરુદ્ધ મોટું ઓપરેશન
• કરોડોની કિંમતના ગાંજાને સપ્લાય કરનાર ડ્રગ્સ માફિયાની ધરપકડ
• આરોપી છેલ્લા બે વર્ષમાં 3500 કિલો ગાંજો ગુજરાતમાં મોકલી ચૂક્યો

સુરત ક્રાઈમ બ્રાંચે છેલ્લા 2 વર્ષમાં શહેરમાં 3.52 કરોડનો ગાંજો મોકલનારા ડ્રગ્સ માફિયા દિલીપ ગૌડાની ધરપકડ કરી છે. ક્રાઈમ બ્રાંચે દિલીપ ગૌડાની ઓડિશાથી ધરપકડ કરી છે. સુરત ક્રાઈમ બ્રાંચને બાતમી મળી હતી કે, આરોપી પોતાના સંબંધીના 12માની વિધિમાં આવી રહ્યો છે. આ બાતમીના આધારે સુરત ક્રાઈમ બ્રાંચે આરોપીની ધરપકડ કરી છે.

આરોપી છેલ્લા 2 વર્ષમાં 3 હજાર 500 કિલો ગાંજો ગુજરાતમાં મોકલી ચૂક્યો છે

ઉલ્લેખનીય છે કે, દિલીપ ગૌડા ઓરિસ્સાના નક્સલવાદી વિસ્તારમાં ગાંજાનું વાવેતર કરતો હતો. જ્યાર બાદ ટ્રકમાં ગુપ્ત ખાના બનાવીને સમગ્ર દેશમાં ગાંજાની સપ્લાય કરતો હતો. આ આરોપી છેલ્લા 2 વર્ષમાં 3500 કિલો ગાંજો ગુજરાતમાં મોકલી ચૂક્યો છે. આ અગાઉ 2020માં સુરત ક્રાઈમ બ્રાંચે પુણા વિસ્તારમાંથી 564 કિલો ગાંજો જપ્ત કર્યો હતો. તથા 2021માં પણ 1 હજાર 9 કિલો ગાંજો જપ્ત કર્યો હતો. આ દરમિયાન પણ ગાંજાની સપ્લાયમાં ઓરિસ્સાના દિલીપ ગૌડાનું નામ સામે આવ્યું હતું. જેથી 2 વર્ષથી સમગ્ર દેશની પોલીસ દિલીપની શોધખોળ કરી રહી હતી. ક્રાઈમ બ્રાન્ચની ટીમ આરોપીને લઈને સુરત આવી ગઇ છે.

તમામે તમામ ગાંજાના સપ્લાયર તરીકે દિલીપ ગૌડાનું નામ સામે આવતું: ક્રાઇમ બ્રાંચ PI

આ અંગે સુરત ક્રાઇમ બ્રાંચના PI લલિત વાગડિયાએ નિવેદન આપતા જણાવ્યું કે, 'સિટીના બે ગુના છે. એની અંદર એક 564 કિલો ગાંજો એટલે કે 56 લાખનો ગાંજો પકડવામાં આવ્યો હતો. ત્યાર બાદ ક્રાઇમ બ્રાંચે બીજો 1009 કિલો એટલે કે 1 કરોડ ઉપરનો ગાંજો પકડ્યો હતો. પલસાણા પોલીસે 1 કરોડ ને 10 લાખનો ગાંજો પકડ્યો હતો. એવી રીતે કોસંબા પોલીસે પણ 80 લાખ ઉપરનો ગાંજો પકડ્યો હતો. આ તમામે તમામ ગાંજાના સપ્લાયર તરીકે દિલીપ ગૌડાનું નામ સામે આવતું હતું અને તેને પકડી પાડવામાં આવ્યો છે.'