શરમજનક કિસ્સો / લ્યો બોલો, વેવાઇ-વેવાણ બાદ હવે સુરતમાં મોટાભાઇ પોતાના નાનાભાઈની પત્નીને લઇને ભાગી ગયા

• સુરતમાં બીજો લાંછન લગાવતો કિસ્સો
• મોટાભાઇ નાનાભાઇને પત્નીને લઇને ભાગી ગયા
• બન્નેએ ભાગીને મૈત્રી કરાર કરી લીધો

જેઠ વહુના સંબંધને લાંચન લગાવતો કિસ્સો સુરતમાં સામે આવ્યો છે. સુરતમાં પરિણીત મોટાભાઇને તેના નાનાભાઇની પત્ની સાથે પ્રેમ થઇ જતા બન્ને ભાગી ગયા હોવાનું સામે આવ્યું છે. હાલ તો મોટાભાઈના પત્ની અને નાના બાળકો મુશ્કેલીમાં મુકાયા છે. પરિવારજનોએ બન્નેની શોધખોળ કરી હતી પરંતુ બન્નેએ મૈત્રી કરાર કરી લીધો છે.

પુણા પોલીસ સ્ટેશનમાં પરિણીતા દ્વારા કરવામાં આવેલી અરજીમાં પોતાના પતિની કરતૂતો ખુલ્લી પાડી હતી. પત્નીએ જણાવ્યું હતું કે, મારા પતિ મારી સાથે વારંવાર મારઝૂડ કરતા હતા. તેઓ જુગાર પણ રમતા અને રમાડતા હતા. સાથે ચોરી છુપે દારૂ પણ વેચતા હતા. જોકે પુણા પોલીસે પરિણીતાની વાતને ધ્યાને ન લેતા પરિણીતાએ પોલીસ કમિશનર કચેરી ખાતે જઇ અરજી કરી ન્યાયની માંગણી કરી છે.

લૉકડાઉનમાં નાનાભાઇના પરિવાર સાથે મોટોભાઇ પણ વતન ગયો હતો

પરિણીતાના પતિ તેના નાનાભાઈના ઘરે વારંવાર જતો હતો. તેથી પરિણીતાને શંકા જતા તપાસ કરી હતી. જેમાં સામે આવ્યું કે, પતિને તેના નાનાભાઈની પત્નીની સાથે પ્રેમ સંબંધ હતો. લૉકડાઉન દરમિયાન નાનાભાઈ અને તેની પત્ની વતન જતા રહ્યા હતા આ દરમિયાન પરિણીતાનો પતિ પણ ઘર છોડીને વતન ચાલ્યો ગયો હતો. જોકે મોટાભાઇ નાનાભાઈની પત્નીને 16 જૂનના રોજ લઇને ફરાર થઇ ગયો હતો.

પરિણીતાના આક્ષેપો અનુસાર, સમગ્ર મામલે ભાંડો ફુટતા તેમણે સાસરિયા અને પરિવારજનોને જાણ કરી હતી. ત્યાર બાદ પતિ તેને માર મારતો અને છૂટાછેટા માટે પણ દબાણ કરતો હતો. સાથે તેમણે હત્યાનો પણ પ્રયાસ કર્યો હોવાના આક્ષેપો લગાવ્યા છે.