ચૂંટણી / લોકસભા પહેલાં ભાજપને મોટો ફટકો, ગુજરાતની આ વિધાનસભા બેઠકની ચૂંટણી રદ્દ

લોકસભાની ચૂંટણી પહેલાં ભાજપને મોટો ફટકો પડ્યો છે. દ્વારકા વિધાનસભા વિધાનસભા 2017ની ચૂંટણી રદ કરાઈ છે. ભાજપના ઉમેદવાર પબુભા માણેકના ફોર્મમાં ભૂલ હોવાના કારણે કોંગ્રેસના ઉમેદવાર મેરામણ ગોરિયાએ હાઈકોર્ટમાં અરજી કરી હતી અને ચૂંટણી રદ કરવાની માગણી કરી હતી.
 

ઉલ્લેખનીય છે કે, પબુભા માણેકે જે ફોર્મ ભર્યું હતુ તેમાં પબુભા કઈ સીટ પરથી ચૂંટણી લડી રહ્યા છે તે જ દર્શાવ્યું ન હતું. એટલું જ નહીં પબુભાનું ડમી ફોર્મ જેમણે ભર્યું હતું તે નિલેશ માણેકે પણ ફોર્મમાં વિધાનસભાનો વિસ્તાર દર્શાવ્યો ન હતો.

સમગ્ર અહેવાલ પર નજર કરીએ તો, દ્વારકા વિધાનસભા 2017ની ચૂંટણીમાં વિજેતા બનેલા ભાજપના ઉમેદવાર પબુભા માણેકના ફોર્મમાં ભુલ હોવાના મામલે થયેલી રીટના અનુસંધાને આજે ગુજરાત હાઈકોર્ટે દ્વારકા વિધાનસભાની 2017ની ચૂંટણી રદ્દ કરવાનો આદેશ કર્યો છે. દ્વારકા કોંગ્રેસના ઉમેદવાર મેરામણ ગોરિયાએ ભાજપના ધારાસભ્ય પબુભા માણેકના ઉમેદવારી પત્રમાં ભુલ હોવાના મામલે હાઈકોર્ટમાં અરજી કરી હતી. હાઈકોર્ટના આદેશથી ભાજપને વધુ એક ફટકો પડ્યો છે.