કાર્યવાહી  / ગુજરાત ભાજપના મોટા એક્શન, ભાવનગરના આ નેતાને કર્યા સસ્પેન્ડ, જાણો કારણ

• ભાવનગરમાં બિનસચિવાલય પરીક્ષામાં ગેરરીતિના પ્લાનનો મામલો
• ભાજપ નેતા વૈભવ જોષી બુથ મેનેજમેન્ટ સેલના મુખ્ય સંયોજક પદેથી સસ્પેન્ડ
• અગાઉ ગેરરીતિના પ્લાનનો વીડિયો થયો હતો વાયરલ 
• પરીક્ષામાં 50-50 હજાર લઇ કુલ 18 લાખનું કલેકશન કરાયું હતુ 

ભાવનગરમાં બિનસચિવાલય પરીક્ષામાં ગેરરીતિના પ્લાન મામલે એક વિડીયો સામે આવ્યો હતો. જે બાદમાં તે વિડીયોમાં કથિત રીતે દેખાતા ભાજપ નેતા વૈભવ જોષી સામે મોટી કાર્યવાહી થઈ છે. વિગતો મુજબ ભાજપ નેતા વૈભવ જોષી સંયોજક પદેથી સસ્પેન્ડ કરવામાં આવ્યા હતા. તાજેતરમાં વાયરલ થયેલા વિડીયોમાં પરીક્ષામાં 50-50 હજાર લઇ કુલ 18 લાખનું કલેકશન કરાયું હોવાનું ચર્ચાઇ રહ્યું હતું. આ બધાની વચ્ચે હવે વૈભવ જોષી સંયોજક પદેથી સસ્પેન્ડ કરવામાં આવ્યા છે. 

શુ હતી સમગ્ર ઘટના ? 

તાજેતરમાં રદ થયેલી બિન સચિવાલયની પરીક્ષામાં ગેરરીતિ અંગેનો વીડિયો વાયરલ થયો હતો. જેમાં ભાજપ નેતા વૈભવ જોષી નજરે પડી રહ્યા છે. તો વીડિયોમાં પેપર દરમ્યાન ફરજ પર સંકળાયેલા શિક્ષણ અને પાલિકા તથા શાળાના સ્ટાફને રૂપિયા આપ્યા હોવાનું સાંભળવા મળી રહ્યું છે. તો પેપર સોલ્વ કરવા માટે 7 શિક્ષકો માટે અલગ વ્યવસ્થા કરી હોવાનું પણ સાંભળવામાં આવી રહ્યું છે. તો બિન સચિવાલયની પરીક્ષા રદ્દ થતા પોતે 5 લાખ દેવામાં ઉતરી ગયો હોવાની વાત પણ કરવામાં આવી રહી છે. 

વાયરલ વિડીયોમાં શુ હતું ? 

ગુજરાતમાં સરકારી ભરતીની પરીક્ષામાં ગેરરીતિના વારંવાર આક્ષેપો લાગતા રહે છે. અનેક વખત અધિકારીઓ અને નેતાઓ પર ધગધગતા આરોપો લાગ્યા છે. તેવામાં રદ્દ થયેલી બિન સચિવાલયની પરીક્ષામાં થયેલી ગોઠવણ અંગેનો કથિત વીડિયો વાયરલ થયો હતો. ભાવનગરના ભાજપના નેતા વૈભવ જોષીનો વીડિયો સામે આવ્યો છે. જે વીડિયોમાં સાંભળવા મળી રહ્યું છે કે, પરીક્ષામાં 50-50 હજારમાં સેટિંગ પાડી ઉમેદવારો પાસેથી 18 લાખનું કલેક્શન કર્યું હતું.

વીડિયો બનાવટી હોવાનો ભાજપના નેતા વૈભવ જોષીએ કર્યો હતો દાવો 

વીડિયો વાયરલ થતાં ખુદ ભાજપના નેતા વૈભવ જોષીએ દાવો કર્યો હતો કે, આ વીડિયો તળાજાના નિકુંજ રાઠોડ અને તેના પિતાએ વહેતો કર્યો છે. જે વીડિયો પાંચ વર્ષ જૂનો અને બનાવટી છે. વધુમાં તેમણે કહ્યું કે, આ એડિટિંગ કરેલો વીડિયો છે. નિકુંજ રાઠોડ વિરુદ્ધ 52 લાખના ચેક રિટર્નની પોતે ફરિયાદ કરી હોય જે પરત ખેંચવા માટે એડિટ કરેલી ક્લિપ વાયરલ કરી હોવાનું જણાવ્યુ હતું.