રશિયા-યુક્રેન યુદ્ધ / બિડેનની જિનપિંગને ખુલ્લી ધમકી, કહ્યું- 'જો ચીન રશિયાને કોઇપણ પ્રકારની મદદ કરશે તો...'

• રશિયા-યુક્રેન યુદ્ધનો આજે ૨૪મો દિવસ
• ચીન રશિયાને મદદ કરશે તો ગંભીર પરિણામો ભોગવવાં પડશે: બિડેનની ધમકી
• અનેક શહેરો તબાહ, રશિયાએ ૧,૦૮૦થી વધુ મિસાઈલો દાગી

રશિયા-યુક્રેન વચ્ચે ચાલી રહેલા યુદ્ધનો આજે ૨૪મો દિવસ છે. રશિયા દ્વારા યુક્રેન પર કરવામાં આવેલા હુમલાના કારણે યુક્રેનનાં કેટલાંય મોટાં શહેરો તબાહ થઈ ગયાં છે. બીજી બાજુ લાખો લોકો દેશ છોડીને ભાગી ગયા છે. રશિયા-યુક્રેન વચ્ચે ચાલી રહેલા ઘમસાણ જંગ વચ્ચે અમેરિકાના પ્રમુખ જો બિડેને ચીનના પ્રમુખ શી જિનપિંગ સાથે વીડિયો કોન્ફરન્સિંગ દ્વારા યુક્રેન પર રશિયાના હુમલા અને રશિયા પર અમેરિકા સહિતના પશ્ચિમના દેશોના કડક પ્રતિબંધોને લઈને ચર્ચા કરી હતી. આ ચર્ચા દરમિયાન જો બિડેને ચીનના પ્રમુખ શી જિનપિંગને ખુલ્લી ધમકી આપતાં જણાવ્યું હતું કે ચીન જો રશિયાને કોઈ પણ પ્રકારની મદદ કરશે તો ચીનને તેનાં ગંભીર પરિણામો ભોગવવા પડશે. બિડેને એવી ધમકી પણ આપી છે કે ચીન જો રશિયાને મદદ કરશે તો તેનાં પરિણામો સારાં નહીં આવે. 

અમેરિકાએ આપ્યો સજજડ જવાબ

બિડેન અને જિનપિંગ વચ્ચે રશિયા-યુક્રેનને લગતા અનેક મુદ્દાઓ પર વાતચીત થઈ હતી. યુક્રેનમાં પુતિન દ્વારા રશિયન સૈનિકો તહેનાત કરાયા બાદ બિડેનની શી જિનપિંગ સાથે આ ચોથી વખતની વાતચીત થઈ હતી, જોકે સામા પક્ષે ચીને પણ આ વાતચીત બાદ અમેરિકાને સજ્જડ જવાબ આપ્યો છે.

આ પ્રકારની આપી દીધી સલાહ

શી જિનપિંગે બિડેનને જણાવ્યું છે કે યુક્રેન સંકટ કોઈ એવી બાબત નથી, જેને અમે જોવા ઈચ્છીએ છીએ. જિનપિંગે બિડેનને વિશ્વશાંતિ અને સ્થિરતા માટે આંતરરાષ્ટ્રીય જવાબદારીઓ અદા કરવાને લઈ અમેરિકા-ચીનના સંયુક્ત સહકારની અપીલ કરી છે. શી જિનપિંગે જણાવ્યું છે કે ચીન અને અમેરિકાએ વૈશ્વિક જવાબદારીઓ વહેંચવી જોઈએ. તેમણે બિડેનને જણાવ્યું કે શાંતિ અને વિકાસની વર્તમાન પ્રવૃત્તિઓ ગંભીર પડકારોનો સામનો કરી રહી છે. વિશ્વ અત્યારે નથી શાંત કે નથી સ્થિર. સંઘર્ષ અને ટકરાવ કોઈના હિતમાં નથી અને શાંતિ તેમજ સુરક્ષાને આંતરરાષ્ટ્રીય સમુદાયે મહત્ત્વ આપવું જોઈએ. અમેરિકાએ એવો દાવો કર્યો છે કે ૨૪ દિવસમાં રશિયાએ યુક્રેન પર ૧,૦૮૦થી વધુ મિસાઈલો દાગી છે, જેના કારણે યુક્રેનનાં શહેરો ખંડેરમાં ફેરવાઈ ગયાં છે.

યુક્રેને રશિયન સેનાને કીવથી ૭૦ કિમી દૂર ખદેડી

યુદ્ધમાં યુક્રેન રશિયાને જોરદાર ટક્કર આપી રહ્યું છે. યુક્રેને રાજધાની કીવને લઈને એવો ચક્રવ્યૂહ કર્યો છે કે જેને ભેદવામાં રશિયાની સેના અત્યાર સુધી નિષ્ફળ જ રહી છે. યુક્રેને હવે એવો દાવો કર્યો છે કે તેમના જાંબાઝ સૈનિકોએ ફરી એક વાર રાજધાની કીવ સાથે જોડાયેલા ૩૦ વિસ્તારોને પોતાના કબજામાં લઈ લીધા છે અને રશિયન સેનાને જડબાતોડ જવાબ આપીને રાજધાની કીવથી ૭૦ કિલોમીટર દૂર ખદેડી મૂકીને પાછળ ધકેલી દીધી છે. યુક્રેનના સૈનિકો તરફથી જોરદાર જવાબ મળ્યા બાદ રશિયા હવે કીવ પર કબજો કરવા માટે પોતાનાં ઘાતક હથિયારોના ઉપયોગની યોજના ઘડી રહ્યું છે અને કીવને ચોમેરથી ઘેરવા માટે કીવ સહિત અલગ અલગ શહેરોમાં રશિયા તોપ અને ટેન્કોથી સતત હુમલા કરી રહ્યું છે.