ભુજથી અમદાવાદ નકલી કરન્સી ફેરવવા આવેલી ઠગ ત્રિપુટી ઝડપાઈ છે. આ ટોળકી અસલી-નકલી કરન્સીના નામે લોકો સાથે ઠગાઈ કરતી હતી. છ જેટલા લોકો પાસેથી લાખો રૂપિયા પડાવ્યા હોવાનું તપાસમાં ખુલ્યું છે. ત્યારે જાણો અસલી-નકલી કરન્સીની ગેમમાં પોલીસે કેવી રીતે બાજી મારી...
કચ્છથી અમદાવાદમાં આવી અસલી-નકલી કરન્સી
નકલી કરન્સી આપવાના નામે કરતા છેંતરપીડી
અમદાવાદ પોલીસના સંકજામા ફસાઈ ગેંગ
અમદાવાદથી ઝડપાયેલી કચ્છની આ ઠગ ટોળડીએ અસલી-નકલી કરન્સીના નામે અનેક લોકો પાસેથી લાખો રૂપિયા પડાવ્યા હતા. જોકે આ ત્રિપુટી અમદાવાદ પોલીસના સંકજામાં ફસાઈ ગઇ છે. ઘટનાની વિગત એવી છે કે ઝોન-2 સ્કોડને બાતમી મળી હતી કે કચ્છથી નકલી નોટો વટાવવા એક ટોળકી ફરી રહી છે. ઝોન 2 સ્કોડએ બાતમીના આધારે ડમી ગ્રાહક ઉભો કરી આરોપીઓનું છટકું ગોઠવ્યું હતું. આરોપીઓ ડમી ગ્રાહકને કરન્સી આપવા માટે આવ્યાને પોલીસે ઝડપી લીધા હતાં. પોલીસે પકડેલા આરોપીમાં હાસમખાન ફઝલખાન પઠાણ, સાલે અલી શમા અને અબ્દુલ ખામીશા કેવરનો સમાવેશ છે. ત્રણેય ભુજના રહેવાસી છે.
અસલી-ચલણી નોટો સામે નકલી નોટો ડબલ આપવામાં આવતી
આ ટોળકીની મોડેસ ઓપરેન્ડી પણ અલગ પ્રકારની હતી જેથી લોકોને શંકા ન જાય. આરોપીઓ અસલી ચલણી નોટો સામે નકલી નોટો ડબલ આપવામાં આવશે તેવી લાલચ ગ્રાહકને આપતા હતા. બાદમાં ગ્રાહક સાથેના પહેલા સોદામાં આરોપીઓ અસલી નોટ આપતા. જેથી અસલી કરન્સી માર્કેટમાં ચાલી જાય એટલે ગ્રાહકને ટોળકી પર વિશ્વાસ બેસતો હતો. પછીથી અન્ય કોઈ મોટા ચલણીનોટોના સોદામાં આરોપીઓ ગ્રાહકને નકલી કરન્સી આપી તેની સાથે ઠગાઈ આચરતા હતા. આ પ્રકારે આ ટોળકીએ છ વ્યકિતઓ પાસેથી લાખો રૂપિયા પડાવ્યા હોવાનુ તપાસમા ખુલ્યુ છે.
ગાંધીનગરના કુખ્યાત જશુ ચૌધરીનો સાગરીત છે સાલે અલી સમા!
પકડાયેલ આરોપીઓ પાસેથી કાર, રોકડા 1.45 લાખ, 5 મોબાઈલ સહિત કુલ 7.36 લાખનો મુદ્દામાલ કબ્જે કર્યો છે. આ ઠગ ટોળકીનો મુખ્ય સૂત્રધાર સાલે અલી સમા છેલ્લા 20 વર્ષથી આજ મોડેશ ઓપરેન્ડીથી અનેક લોકોને ઠગાઈનો ભોગ બનાવી ચુક્યા છે. તે ગાંધીનગરના કુખ્યાત જશુ ચૌધરીનો સાગરીત હોવાનું પણ ખુલ્યું છે. જેથી પોલીસે આ ટોળકીએ અન્ય કેટલા લોકોને ટાગ્રેટ કર્યા અને અન્ય કોઈ આરોપીઓ સંડોવાયેલા છે કે નહિ તે મુદ્દે તપાસ શરૂ કરી.