VIDEO: Facebook ફ્રેન્ડ બનાવી લોકો પાસેથી પૈસા ખંખેરતી ગેંગ પોલીસ સકંજામાં

ભુજ: Facebook ફ્રેન્ડ બનાવી હની ટ્રેપ ગોઠવી લોકોને ફસાવતી ગેંગને ભુજ એ-ડિવિઝન પોલીસે ઝડપી પાડ્યા છે. ભુજના પ્રશાંત પાર્ક વિભાગ-3માં આ બનાવ બન્યો હતો. આ ષડયંત્રમાં સામેલ હફીજા અને જહાંગીર ઉર્ફે જાવેદ ગુલાબખાન પઠાણ બંને પતિ-પત્ની છે. બંને મૂળ ભુજના સંજોગનગરમાં ઝકરીયા મસ્જિદ પાસેના રહેવાસી છે અને પ્રશાંત પાર્કમાં ભાડાનું મકાન રાખ્યું હતું. 

પોલીસે મુમતાઝ હફીજા જહાંગીર અને મજીદ ઉર્ફે મંજલો આદમ થેબાની અટકાયત કરી લીધી છે. જો કે જુબેર નામનો પાંચમો શખ્સ પોલીસના હાથ લાગ્યો નથી. બાતમીદારોને કામે લગાડી પોલીસે એક આરોપીને દબોચી લીધો હતો. તેની પૂછતાછમાં અન્ય આરોપીઓ ઝડપાઈ ગયાં છે. 

ઉલ્લેખનીય છે કે આરોપીઓની પૂછપરછ દરમિયાન અગાઉ તેમણે આ રીતે અન્ય કોઈને હની ટ્રેપમાં ફસાવ્યાં છે કે કેમ તે સહિતની બાબતોનો તાગ મળવાની શક્યતા છે.આપને જણાવી દઇએ કે દેશલપરના વિનોદ નારણભાઈ પઢારીયા નામના 26 વર્ષિય યુવકને ફેસબૂક પર ફ્રેન્ડ બનાવી હફિજાએ હની ટ્રેપમાં ફસાવ્યો હતો. વિનોદ ગઈકાલે બપોરે ભુજ આવ્યો ત્યારે હફિજાએ તેને મળવા બોલાવ્યો હતો. બાદમાં આરોપીઓએ તેને બળાત્કાર કેસમાં ફીટ કરી દેવાની તેમજ અશ્લિલ વિડિયો ક્લિપ વાયરલ કરી દેવાની ધાકધમકી આપી રૂ.25 હજારની રોકડ રકમ પડાવી લીધી હતી.