વિરોધ / ભાવનગર યુનિ.એ 3જા તબક્કાની પરીક્ષાનું આયોજન કરતા વિદ્યાર્થીઓ આવ્યા મેદાનમાં, કહ્યું- કોરોના થશે તો કોણ જવાબદાર?

• ભાવનગર યુનિ.નું 7મી ડિસેમ્બરે પરીક્ષાનું આયોજન
• વિદ્યાર્થીઓની પરીક્ષા રદ કરવા માગ
• 2 વિદ્યાર્થી નેતાઓની અટકાયત

મહારાજા કૃષ્ણકુમારસિંહજી ભાવનગર યુનિવર્સિટીના સત્તાધીશોએ અગાઉ કોરોનાના કહેર વચ્ચે કેટલીક પરીક્ષા સફળતાપૂર્વક લીધા બાદ હવે અંતિમ તબક્કામાં UG અને PG પરીક્ષા લેવાનું નક્કી કર્યું છે. પરંતુ હવે આ પરીક્ષા સામે વિરોધનો વંટોળ ઉભો થવા પામ્યો છે. ભાવનગર યુનિવર્સિટી દ્વારા આગામી 7 ડિસેમ્બરથી UGના 3 અને PGના 5માં સેમેસ્ટરની પરીક્ષા લેવાનું શરુ કરવામાં આવશે. કુલ 28,000 વિદ્યાર્થીઓ આ પરીક્ષા આપવાના છે. 

જોકે આ માટે યુનિવર્સિટીના સત્તાધીશોએ 3 સેશનમાં પરીક્ષા લેવાનું નક્કી કર્યું છે. અહીં સતાવાળાઓએ પેપર માત્ર 48 માર્કનું રહેશે અને તેમાંથી 18 માર્ક્સ લેનારાને પાસ જાહેર કરવામાં જાહેરાત કરી છે. યુનિવર્સિટીના સત્તાધીશો દ્વારા 38 સેન્ટરોએ સોશિયલ ડીસ્ટન્સ, માસ્ક, થર્મલ ગન સહિતની સુવિધા પણ ઉભી કરવાનું નક્કી કરાયું છે. 

જો કે વિદ્યાર્થીઓનું કહેવું છે કે જો બીજી યુનિવર્સિટી કોરોનાના કારણે પરીક્ષા રદ કરી શકે તો ભવનગર યુનિવર્સિટી વાળા શા માટે પરીક્ષા લેવાનો આગ્રહ રાખે છે. બીજીબાજુ વિદ્યાર્થીઓનું કહેવું છે કે અમારી પાસેથી તેમના સ્વાસ્થ્ય માટે બાહેંધરી પત્ર લેવામાં આવે છે તે પણ વ્યાજબી નથી. જો કોઈ વિદ્યાર્થીને કોરોના થશે તો જવાબદારી કોની તેવા સવાલો પણ ઉભા કરવામાં આવ્યા છે.

બીજી તરફ તળાજાના ધારાસભ્ય કનુ બારૈયાએ મુખ્યમંત્રીને પત્ર પાઠવીને પરીક્ષા મોકૂફ રાખવા માંગ કરી છે. સત્તાવાળાનું કહેવું છે કે અમે લોકોએ અગાઉ પરીક્ષા લીધી છે. તેમાં કોઈ મુશ્કેલી વિદ્યાર્થીઓને પડી નથી. અત્યારે આ અંતિમ તબક્કાની પરીક્ષા પણ વિદ્યાર્થીઓ તેમના હિત ખાતે આપે તે જરુરી છે. આજે 300થી વધુ વિદ્યાર્થીઓ યુનિવર્સિટી દોડી આવ્યા હતા અને રજુઆત કરી હતી. અહીં મોટી સંખ્યામાં વિદ્યાર્થીઓ હોવાથી પોલીસ કાફલો પણ ઘટના સ્થળે દોડી આવ્યો હતો અને રજૂઆત બાદ 2 વિદ્યાર્થી નેતાઓની અટકાયત કરી હતી.