ભાવનગર: અલંગ શિપ બ્રેકિંગ યાર્ડમાં અકસ્માત 2 શ્રમિકોએ ગુમાવ્યા જીવ

ભાવનગરના અલંગ શીપ બ્રેકિંગ યાર્ડમાં અકસ્માત સર્જાતા બે શ્રમિકોનાં મોત થયા છે. શીપ બ્રેકિંગમાં કામ કરી રહેલા બે શ્રમિકો ઉપરથી નીચે પટકાતા તેઓના ઘટના સ્થળે જ મોત થયા છે. આ દુર્ઘટના પ્લોટ નંબર 103માં સર્જાઈ હતી. તો ઘટનાના પગલે પોલીસ પહોંચી હતી અને આગળની કાર્યવાહી હાથ ધરી છે.

આ ઘટના મામલે મળતી વિગત અનુસાર આજરોજ ભાવનગરના અલંગ શીપ બ્રેકિંગ યાર્ડ ખાતે એક દુર્ઘટનાનો બનાવ બન્યો હતો. આ ઘટનામાં અલંગના શિપયાર્ડ ખાતે આવેલ પ્લોટ નંબર 103માં શિપ બ્રેક કરતા સમયે આવો અકસ્માત સર્જાયો હતો.

આ ઘટનામાં કામ કરી રહેલા બંને શ્રમિકો અચાનક વખતે ઉપરથી નીચે પટકાયા. આ ઘટનાને પગલે બન્નેનું ઘટનાસ્થળે જ મોત થયું છે. આ મામલાની જાણ થતા જ કામ કરી રહેલા સ્થાનિક લોકો પણ ઘટના સ્થળે આવી પહોંચ્યા હતા તથા યાર્ડના કેટલાક અધિકારીઓ પણ દોડી આવ્યા હતા.

જો કે આ ઘટનાની જાણ સ્થાનિક પોલીસને થતા જ પોલીસ કાફલો ઘટનાસ્થળે આવી પહોંચ્યો હતો અને બન્નેના મૃતદેહને સરકારી હોસ્પીટલમાં પીએમ અર્થે તળાજા ખાતે મોકલી આપવામાં આવ્યા હતા જો કે મૃતકોની ઓળખાણ કરવા પણ કંપનીએ કમર કસી હતી જેથી બંન્નેના પરિવારજનોને આ ઘટનાની જાણકારી આપી શકાય.