પશ્ચિમ બંગાળના ઉત્તર દિનાઝપુર જિલ્લાના ચપોરી ગામે રહેતી એક યુવતી તેના પરિવારથી છેલ્લાં 20 દિવસથી વિખુટી પડી ગઈ હતી. જાણો કેવી રીતે યુવતીનો પરિવાર સાથે થયો ભેટો...
બંગાળની દીકરીનું પરિવાર સાથે મિલન
બંગાળથી પહોંચી ગઈ હતી ગુજરાત
પરિવારથી છેલ્લાં 20 દિવસથી વિખુટી પડી ગઈ હતી
પશ્ચિમ બંગાળના નાના એવા ગામ ચપોરીમાં રહેતી સમીમા ખાતુન નામની યુવતી પોતાના પરિવારથી હજાર કિલોમીટર દૂર ભાવનગર પહોંચી ગઇ હતી. ગત 4 તારીખે ભાવનગર રેલવે સ્ટેશન પર આ યુવતી જોવા મળતી હતી. કોઈ વ્યક્તિએ આ ઘટના અંગે અભયમ હેલ્પ લાઈનમાં જાણ કરી હતી કે અહીં એક યુવતી છેલ્લા બે-ચાર દિવસથી એકલી અટુલી રેલવે સ્ટેશન ઉપર બેઠી છે. ત્યારે સખી વનસ્ટોપની બહેનોએ આ યુવતીને લઈને તેમને ભાવનગરની વિકાસગૃહ સંસ્થામાં સોંપી હતી.
ફિંગરપ્રિન્ટ વડે આધારકાર્ડની ડિટેલ મેળવી
આમતો આ યુવતી માત્ર બંગાળી ભાષા જ જાણતી હતી. જેને લઇને તે ક્યાંની છે ? કોની દીકરી છે ? કઈ રીતે અહીં આવી ? તે જાણવું ટ્રસ્ટીઓ માટે મુશ્કેલ બન્યુ હતું. પરંતુ ટ્રસ્ટીઓએ તેમની સાથે કાઉંસેલીંગ કરીને આખરે જાણ્યું કે આ યુવતી બંગાળની છે. ફિંગરપ્રિન્ટ વડે આધારકાર્ડની ડિટેલ મેળવી, જેનાથી યુવતીનું એડ્રેસ મળી આવ્યું હતું. બાદમાં પોલીસને સાથે રાખી ત્યાં તપાસ કરતા તેમના પરિવારજનો માળી આવ્યા અને ત્યાં આ યુવતી ગુમ થઇ હોવાની ફરિયાદ પણ નોંધાઇ હતી. જેથી પોલીસે તેમના પરિવારને જાણ કરી હતી. આજે આ પરિવાર આ યુવતીને લેવા ભાવનગર આવી પહોંચ્યો હતો.
ભાવનગરની વિકાસ ગૃહ સંસ્થાએ આ 26 વર્ષીય યુવતીને 20 દિવસ સુધી સાચવી
ભાવનગરની વિકાસ ગૃહ સંસ્થાએ આ 26 વર્ષીય યુવતી સમીમાને 20 દિવસ સુધી સાચવી અને તે દરમયાન તેમના પરિવારજનો સાથે વાર્તાલાપ પણ ચાલુ રાખ્યો હતો. બાદમાં ખરાઈ કર્યા બાદ આ યુવતીને તેમના પરિવાર સાથે ભેટો કરાવવાનું નક્કી કરવામાં આવ્યું હતું. આ યુવતી 12 ધોરણ પાસ છે, પરંતુ ભાવનગરમાં તે ટ્રેન મારફતે કેમ પહોંચી અને શા માટે પહોંચી તે સવાલ આજે પણ ઉભો છે. જોકે આ યુવતીને કોઈએ કલાકાતાથી કોઈ ટ્રેનમાં ક્યાં ઇરાદે બેસાડી દીધી હશે તે પણ સવાલ છે. આજે આ યુવતીને લેવા તેમનો ભાઈ અને ચપોરી ગામના સરપંચ ભાવનગર આવી પહોચ્યા હતા. આ યુવતી તેના ભાઈને મળતા આંખો ભીંજાઈ ગઈ હતી અને પરિવારમાં ખુશી છવાઈ ગઈ હતી.
પરિવારજનો સાથે ભેટો થતા જ તેના ચેહરા ઉપર ખુશી જોવા મળી
પશ્ચિમ બંગાળની યુવતીની માતા નથી અને તે તેના ભાઈ સાથે નાના એવા ગામમાં રહે છે. પરંતુ એકલી અટુલી પોતાના વતનથી દૂર અજાણે નીકળી પડ્યા બાદ આજે તેમના પરિવારજનો સાથે ભેટો થતા જ તેના ચેહરા ઉપર ખુશી જોવા મળી હતી. બીજીબાજુ તાપીબાઈ વિકાસગૃહના સંચાલકોએ આ અજાણ યુવતીને સાચવીને તેમના પરિવારજનોને સોંપીને સમાજ સેવાનું ઉમદા ઉદાહરણ પૂરું પાડ્યું છે.