અડગ મનના માનવીને હિમાલય સર કરવો પણ અઘરો નથી લાગતો તે વાતને મુકબધીર બાળાએ સાર્થક કરી છે. માલણકામાં રહેતા શ્રમજીવી પરિવારની હિરલે કે જે ભાવનગરની બહેરામૂંગા શાળામાં ધોરણ 5માં અભ્યાસ કરે છે. આ મુકબધીર બાળા હિરલે તાજેતરમાં કેરળ ખાતે યોજાયેલી મુકબધિરો માટેની રાષ્ટ્રીય કક્ષાની એથ્લેટિક્સની સ્પર્ધામાં 100 મીટર અને 600 મીટર દોડમાં 2 ગોલ્ડ મેળવીને ઝળહળતી સિદ્ધિ પ્રાપ્ત કરી છે.
હિરલના પિતા કડિયાકામ કરીને પોતાના પરિવારનું ગુજરાન ચલાવે છે
હિરલે કેરળમાં મુકબધિરો માટે યોજાયલ સ્પર્ધામાં 2 ગોલ્ડ મેડલ જીત્યા
હિરલની ઉંમર ભલે નાની હોઈ પણ તેનું નિશાન ઊંચું છે
ભાવનગરના માલણકા ગામના વતની વિક્રમ બારૈયા આમ તો કડિયાકામના વ્યવસાય સાથે સંકળાયેલા છે. તેમને કુલ 4 સંતાનો છે જેમાં 2 પુત્રી અને 2 પુત્ર છે. આ પરિવારમાં 1 પુત્રી હિરલ જન્મથી જ મુકબધીર છે. હિરલ સાંભળી પણ નથી શક્તિ અને બોલી શક્તિ પણ નથી. હિરલને આ પરિવારે ભાવનગરમાં આવેલી ખીમચંદ લક્ષ્મીચંદ બહેરામૂંગા શાળામાં અભ્યાસ માટે રાખી છે. તે અહીં હોસ્ટેલમાં જ રહીને અભ્યાસ કરે છે. તાજેતરમાં કેરળમાં 7મી રાષ્ટ્રીય ડેફ જુનિયર અને સબ સિનિયર માટે યોજાયેલી ચેમ્પિયન શિપમાં ભાગ લીધો હતો.
હિરલે 2 ગોલ્ડ મેડલ કબ્જે કર્યા
અહીં તેમને 100 મીટર અને 600 મીટરની દોડમાં સમગ્ર દેશના સ્પર્ધકો વચ્ચે પ્રથમ સ્થાન મેળવીને 2 ગોલ્ડ મેડલ કબ્જે કર્યા છે. તેણીએ તેમનીએ આ સિદ્ધિ પાછળ શિક્ષકો અને કોચની મહેનત હોવાનું જણાવ્યું હતું. હિરલના માતા પિતા બન્ને કડિયાકામ કરીને પોતાનું ગુજરાન ચલાવે છે. હિરલ મુકબધીર હોવાથી તેમના શિક્ષકે સાંકેતિક ભાષામાં તેમની સાથે વાત કરીને પોતાની સિદ્ધિ વર્ણવી હતી.
હિરલ દરરોજ યુનિવર્સિટીના મેદાનમાં દોડવાની કરતી હતી પ્રેક્ટિસ
આમ તો ભાવનગરના માલણકા ગામે વસતો આ પરિવાર આર્થિક રીતે ખુબ પછાત છે. તેમની દીકરીને ભણવી શકે તેમ ના હતો. પરંતુ ભાવનગરની આ બહેરા મૂંગા શાળામાં હિરલને પ્રવેશ અપાતા તેમના પરિવારજનો ખુશ થાય હતા. અહીં રહેતા તમામ વિદ્યાર્થીઓને સંસ્થા દ્વારા કોઈપણ પ્રકારની ફી વિના રાખવા આવે છે. હિરલની ઉંમર ભલે નાની હોઈ પણ તેનું નિશાન ઊંચું છે. હીરલ તેમના કોચ પાસે દરરોજ ભાવનગરની યુનિવર્સિટીમાં મેદાન ખાતે દોડવાની પ્રેક્ટિસ કરતી હતી. આખરે શિક્ષક તેમજ કોચ વગેરેની મહેનત રંગ લાવી છે. હિરલે 2 ગોલ્ડ મેડલ મેળવ્યા છે.
ગુજરાતે કુલ 25 મેડલ મેળવ્યા
જોકે આ સ્પર્ધામાં ગુજરાતને કુલ 25 મેડલ મળ્યા, તેમાં 8 મેડલતો ભાવનગરની બહેરા મૂંગા શાળાને મળ્યા છે તે ખુશીની વાત છે. તેમના પિતા તેમજ શાળાના સંચાલકોએ પણ હીરલની સિદ્ધિને આવકારી હતી. આ શાળાના વિદ્યાર્થીઓએ રાષ્ટ્રીય કક્ષાની સ્પર્ધામાં અનેક ગોલ્ડ અને સીલ્વર મેડલે મેળવ્યા છે પરંતુ આ વર્ષે હિરલે મેળવેલી સિદ્ધિએ ભાવનગરનું નામ માત્ર ગુજરાતમાં જ નહિ દેશભરમાં ગુંજતુ કર્યું છે.