દુર્ઘટના / ભાવનગર-અમદાવાદ હાઇવે પર ટ્રક-કાર વચ્ચે ટક્કરમાં 2ના મોત, જામખંભાળિયા રોડ પર અકસ્માતમાં પતિ-પત્નીના મોત

• અલગ અલગ અકસ્માતોમાં 4 લોકોના મોત
• ભાવનગર-અમદાવાદ હાઈવે પર ટ્રક-કાર વચ્ચે અકસ્માતમાં 2ના મોત
• માંઝા ગામ નજીક ટેમ્પોએ સ્કૂટરને અડફેટે લેતા 2ના મોત 

રવિવારે બે અલગ અલગ અકસ્માતોમાં 4 લોકોના મોત થયા છે. ભાવનગર-અમદાવાદ હાઇવે પર અકસ્માતમાં 2 લોકોના મોત થયા છે. તો જામખંભાળીયા-ભાણવડ રોડ પર અકસ્માતમાં 2 લોકોના મોત થયા છે.

ભાવનગર-અમદાવાદ હાઈવે પર ટ્રક-કાર વચ્ચે અકસ્માતમાં 2ના મોત

ભાવનગર-અમદાવાદ હાઈવે પર કાર અને ટ્રક વચ્ચે ગમખ્વાર અકસ્માત સર્જાયા હતો. કારમાં 5 લોકો સવાર હતા. જેમાંથી 2 લોકોના ઘટનાસ્થળે જ મોત નીપજ્યાં હતા. તો અન્ય 3 ઇજાગ્રસ્તોને સારવાર અર્થે હોસ્પિટલમાં ખસેડાયા છે. કાર અને ટ્રેક વચ્ચે ભયંકર ટક્કર થતા કારનો કચ્ચરઘાણ વળી ગયો હતો. મૃતદેહ બહાર કાઢવા માટે ક્રેઇનની મદદ લેવી પડી હતી. અકસ્માતનો ભોગ બનેલી કાર તેલંગણા પાસિંગની છે.

અકસ્માત સર્જાતા લોકો એકઠા થયા હતા. ત્યારબાદ બચાવ કામગીરી શરૂ કરી દેવાઇ હતી. તો બનાવની પોલીસને જાણ કરી હતી. પોલીસે ઘટનાસ્થળે પહોંચી બે મૃતદેહોને પીએમ અર્થે મોકલી વધુ તપાસ હાથ ધરી છે.

જામખંભાળીયા-ભાણવડ રોડ પર ટેમ્પો અને સ્કૂટર વચ્ચે અકસ્માત સર્જાતા 2ના મોત

જામખંભાળીયા-ભાણવડ રોડ પર અકસ્માત સર્જાયો હતો. માંઝા ગામ નજીક ટેમ્પો અને સ્કૂટર પર અકસ્માત સર્જાતા બે લોકોના મોત નિપજ્યા છે. ટેમ્પોની અડફેટે સ્કૂટર સવાર પતિ-પત્નીના ઘટનાસ્થળે મોત નિપજ્યા. તો બાળક ઇજાગ્રસ્ત થતા તેને હોસ્પિટલ ખસેડવામાં આવ્યો છે.