રાજકારણ / VIDEO: મનસુખ વસાવાએ આદિવાસી નેતા છોટુ વસાવાના કર્યા વખાણ, BJP નેતાઓ પડશે ભોંઠા

• ભરૂચના ભાજપના સાંસદનો છોટુ વસાવા તરફ ઝુકાવ 
• મનસુખ વસાવાએ છોટુ વસાવાના કાર્યને બિરદાવ્યું
• વીડિયો વાયરલ થયા બાદ કરી સ્પષ્ટતા

ભરૂચના ભાજપના સાંસદ મનસુખ વસાવાનો વીડિયો વાયરલ થયો છે. જેમાં તેઓ ઝઘડિયા બેઠક પરથી અપક્ષ ચૂંટણી લડી રહેલા છોટુ વસાવાના વખાણ કરી રહ્યા છે. આ વીડિયો વાયરલ થયા બાદ તેમણે મીડિયા સમક્ષ સ્પષ્ટતા કરી છે.

મનસુખ વસાવાએ છોટુ વસાવાના કાર્યને બિરદાવ્યું  
ભરૂચના ભાજપના સાંસદ મનસુખ વસાવાએ ભાજપની એક સભા દરમિયાન છોટુ વસાવાના વખાણ કર્યા હતા. જે વીડિયો વાયરલ થયો છે. જેમાં તેઓ કહી રહ્યા છે કે, 'છોટુ વસાવા આદિવાસીઓના હક અધિકાર માટે લડત ચલાવે છે. છોટુભાઈ આદિવાસીઓના હક માટે અને અધિકારો માટે લડ્યા છે એ સ્વીકારવું પડે.' 

છોટુભાઈ આદિવાસીઓના હક માટે લડતા આવ્યા છેઃ મનસુખ વસાવા
વીડિયો વાયરલ થયા બાદ ભરૂચના ભાજપના સાંસદ મનસુખ વસાવાએ કહ્યું કે, 'કેટલાક લોકો પ્રશ્ન પૂછે કે શું છોટુભાઈએ કશું નથી કર્યું? ત્યારે મેં કહ્યું છે કે છોટુભાઈ વસાવા આદિવાસીઓના હક માટે લડતા આવ્યા છે. પરંતુ એકલા બીટીપી કે એકલી તાકાતથી સરકાર બનાવી શકતા નથી. બે કે ત્રણ ધારાસભ્ય વર્ષોથી આવ્યા છે.'

ઝઘડિયાથી છોટુ વસાવાએ નોંધાવી છે અપક્ષ ઉમેદવારી
ગુજરાતના રાજકારણમાં ભાગ્યે જ કોઈ એવું હશે જે છોટુભાઈ વસાવાને નહીં ઓળખતું હોય. ગુજરાતના રાજકારણની વાત આવે ત્યારે છોટુ વસાવાનું નામ ન આવે એવું બંને જ નહીં. છેલ્લા લગભગ ચાર દાયકાથી ઝઘડિયા બેઠક અને છોટુ વસાવાનો નાતો જોડાયેલો રહ્યો છે. આ વખતે વસાવાના પરિવારમાંથી ટિકિટને લઈને કકળાટ સામે આવ્યો હતો. મહેશ વસવાએ તેમના પિતા છોટુ વસાવા સામે મોરચો માંડ્યો હતો. બીટીપી પાર્ટીના અધ્યક્ષ મહેશ વસાવાએ પિતાના બદલે ઝઘડિયા સીટ પર પોતાનું નામ જાહેર કરી દેતા વિવાદ સર્જાયો હતો. જે બાદ છોટુ વસાવાએ અપક્ષ ઉમેદવારી નોધાવતા ગુજરાતના રાજકારણમાં ગરમાવો આવ્યો હતો. જે બાદ મહેશ વસાવાએ ફોર્મ પાછુ ખેંચી લીધું હતું. 

આદિવાસીઓના અધિકારો માટે લડે છે છોટુ વસાવા
દક્ષિણ ગુજરાતમાં એક સમયે આદિવાસી નેતા અમરસિંહ ચૌધરીનું વર્ચસ્વ હતું. અમરસિંહ ચૌધરી કોંગ્રેસના નેતા હતા. તેમના પછી આદિવાસી નેતા છોટુ વસાવાએ ભરૂચની ઝગડિયા બેઠક જીતવાનું શરૂ કર્યું. 1990થી સતત જીતનો રેકોર્ડ છોટુ બસવાના નામે નોંધાયેલો છે. આદિવાસીઓના જમીન અધિકારો માટે લડનાર છોટુ વસાવા થોડા જ સમયમાં લોકપ્રિય બની ગયા.

છોટુ વસાવા ક્યારેય ચૂંટણી હાર્યા નથી
છોટુ વસાવાએ 2002ની ગુજરાત વિધાનસભાની ચૂંટણી જીતીને ભાજપને સમર્થન આપ્યું હતું. દક્ષિણ ગુજરાતમાં ભાજપને 30માંથી 16 બેઠકો મળી છે. 2002થી છોટુ વસાવા ભાજપ સાથે સતત ચૂંટણી લડી રહ્યા છે. છોટુ વસાવાનું કદ વધતું ગયું અને કોંગ્રેસ આ બેલ્ટ પર નબળી પડી. જો બાદ છોટુ વસાવાએ ભાજપ છોડીને પોતાની પાર્ટી BTP બનાવી છે અને તેઓ તેમની પાર્ટીની ટિકિટ પર ચૂંટણી લડી રહ્યા છે. છોટુ વસાવાના નામે રેકોર્ડ જીત નોંધાઈ છે. જ્યારથી તેઓ લડ્યા છે ત્યારથી તેઓ એક પણ ચૂંટણી હાર્યા નથી. તેઓ આ વખતે પણ પોતાની જીતનો દાવો કરી રહ્યા છે.