હું જૂનુ ભૂલીને નવી શરૂઆત કરવાનું સમજાવવા ગઈ હતી: રેશ્મા પટેલ
પેલી મહિલા કે જેની સાથે ત્યાં રહે છે તેને બધી જ સગવડ આપી છે: રેશ્મા
ભરતસિંહ સોલંકી અને તેમના પત્ની વચ્ચેના ઘરકંકાસને લઇને એક વીડિયો તાજેતરમાં વાયરલ થયો છે. જે મામલે ભરતસિંહની પત્ની રેશ્મા પટેલે મહત્વનો ખુલાસો કર્યો છે. ભરતસિંહ સોલંકીના પત્નીએ VTV પર ખુલાસો કરતા જણાવ્યું કે, 'હું ભરતસિંહને સમજાવવા પહોંચી હતી. હું હજુ પણ મારા પતિને ચાહુ છું. હું ઇચ્છું છું કે મારા પતિ મારી સાથે પરત આવી જાય. હું મારા પતિને ઘણા સમયથી શોધતી હતી. પછી મને ગઇ કાલે અચાનક ખબર પડી કે તેઓ આણંદ વિદ્યાનગર નજીક ઋતુરાજ આઇસક્રીમની દુકાન આગળ આઇસક્રીમ ખાતા હતા, ત્યારે બંનેને હું જોઇ ગઇ, એટલે મે ગાડી ફોલો કરી અને પછી તે જ્યાં રહે છે, પેલી છોકરી સાથે હું ત્યાં ગઇ. ત્યાં હું ગઇ એટલે ઘરનો દરવાજો બંધ હતો. હું ચૂપચાપ ઉભી રહી અને પછી તેઓએ દરવાજો ખોલ્યો અને પછી હકીકતમાં તો હું તેમને સમજાવવા જ ગઇ હતી. મારી લાગણી હતી એટલાં માટે જ હું તેમને લેવા ગઇ હતી. પરંતુ ત્યાં થોડીક માથાકૂટ થઇ અને તેમને આવવાની ના પાડી. તેમને મારી સામે હાથ ઉગામવાની કોશિશ કરી, અને થોડીક માથાકૂટ થઇ, ઝપાઝપી થઇ ગઇ.'
હું ઇચ્છું છું કે તેઓ પાછા આવી જાય: રેશ્મા પટેલ
વધુમાં કહ્યું કે, 'હું તેમને તે છોકરી સાથે જોઇ ગઇ, તે ત્યાં ઐય્યાસી જ કરે છે એટલે કોઇ પણ સ્ત્રી સ્વાભાવિક છે કે તેવું સહન ના કરે. અને આજે આટલાં વર્ષનું મારું નાનું-સુનું લગ્નજીવન તો છે નહીં તો હું કેવી રીતે છોડી શકું મારા પતિને. આજે હું મારા પતિને પાછા લાવવા ગમે તે કરું તો ખરી ને. ભલે તેમને છૂટાછેડાનો કેસ મૂક્યો હોય કે ગમે તે કર્યું હોય. પરંતુ મારો હજુ પણ પ્રયત્ન છે કે તેમને પાછા લાવું. એટલે હું ઇચ્છું છું કે તેઓ પાછા આવી જાય.'
એ માણસ વ્યભિચાર કરે છે એટલે કોંગ્રેસ પક્ષને પણ નુકસાન થઇ રહ્યું છે: રેશ્મા
અત્યારે મારી પાસે નથી ખાવાના પૈસા કે નથી મને કંઇ ભરણપોષણ આપતા, કશું જ નહીં. અને પેલી મહિલા સાથે જ્યાં રહે છે તેને બધું જ આપે છે, તેને ઘર પણ લાવી આપ્યું છે, તેને ખાવાપીવાની અને ગાડીની બધી જ સગવડ કરી છે. તો આજે હું તો એમની કાયદેસરની પત્ની છું, મારો અધિકાર છે અને તે આવી રીતે ઐયાશી કરે એ તો ના ચાલે ને. કંઇ પત્ની સહન કરી શકે? અને હું બધાને કહું છું, આખાય કોંગ્રેસ મોવડીમંડળને વિનંતી કરું છું, મે અનેક વાર ફરિયાદો પણ કરી છે કે એમને સમજાવે, પાછા લાવે. તેઓ પાછા લાઇન પર આવી જાય. કારણ કે એ માણસ વ્યભિચાર કરે છે એટલે કોંગ્રેસ પક્ષને પણ નુકસાન થઇ રહ્યું છે.'
અત્રે તમને જણાવી દઇએ કે, કોંગ્રેસ નેતા ભરતસિંહ સોલંકી અને રેશ્મા પટેલ વચ્ચેની બબાલનો એક વીડિયો વાયરલ થયો છે. જેમાં પત્ની રેશ્મા પટેલને ભરતસિંહના ઘરે યુવતી જોવા મળતા પત્નીએ ભારે હોબાળો મચાવ્યો છે. વાયરલ વીડિયોમાં ભરતસિંહ અને પત્ની વચ્ચે ભારે ઝપાઝપી થયેલી જોવા મળે છે. હાલ આ સમગ્ર ઘટનાનો વીડિયો સોશિયલ મીડિયામાં વાયરલ થયો છે.