તમે ક્યારેય વિચાર્યું છે કે મશીન પણ પાણીપુરી બનાવશે ? નહીં ને. પરંતુ ગુજરાતના એક યુવકના કારણે આ શક્ય બન્યું છે. યુવકે પોતાની કોઠાસુઝથી બનાવેલું આ મશીન પાણીપુરી આપે છે. એ પણ તમને ગમતા સ્વાદની. જોઈએ કેવું છે આ મશીન અને તેનો આવિષ્કાર કોણે કર્યો.
પાણીપુરીના મશીનનો વીડિયો સોશિયલ મીડિયા પર પણ ખુબ વાયરલ થયો
પાણીપુરીના આ મશીન હાલ સોશિયલ મીડિયા પર ચર્ચાનો વિષય બન્યો છે. જો સરકાર કે કોઈ ખાનગી કંપનીઓ સાથ આપશે તો આગામી સમયમા આ મશીન લૉકલ બજારમાં પણ જોવા મળે તો નવાઈ નહીં. ત્યારે VTVની ટીમે આ આ વાયરલ વીડિયોની તપાસ હાથ ધરી હતી કે આ વીડિયો ક્યાંનો છે.
આ વીડિયોની તપાસ કરતા આ વીડિઓ બનાસકાંઠા જિલ્લાના કાંકરેજ તાલુકાના રવિયાણા ગામમાં રહેતા 32 વર્ષીય ભરતભાઈ ભીખાભાઈ પ્રજાપતિનો હોવાનું બહાર આવ્યું હતું. ભારતભાઈએ અનોખુ પાણીપુરીનું ATM મશીન બનાવ્યું છે. આ ATM મશીનમાં પૈસા નાખવાથી તમારી મનપસંદની પકોડી એક-એક કરી બહાર આવે છે, જે ગ્રાહક જાતે જ ઉઠાવી ખાઈ શકે છે.
32 વર્ષીય ભરતભાઈએ તૈયાર કર્યું આ મશીન
બનાસકાંઠાના કાંકરેજ તાલુકાના રવિયાણા ગામમાં રહેતા ભરત પ્રજાપતિએ બનાવ્યું છે. નકામાં પડેલા ઈલેક્ટ્રોનિક સાધનથી મશીન બનાવવામાં અંદાજે છ મહિનાનો સમય લાગ્યો છે. માત્ર 10 ચોપડી જ ભણેલા ભરતભાઈના આ આવિષ્કારથી લોકો ચોકી ગયા છે. ભરતભાઈને આ મશીન અન્ય જ્યાએ પણ લોન્ચ કરવાની ઈચ્છા છે. જોકે અત્યાર સુધીમાં ભરતભાઈને હજારો ફોન આવી ગયા છે. એટલે જ ભરતભાઈને પોતાનો મોબાઈલ સ્વીચ ઓફ કરી દેવો પડ્યો છે.
આ મશીન એક ATM સિસ્ટમ જેવું જ છેઃ ભરતભાઇ
આ મામલે ભરતભાઈએ જણાવ્યું હતું કે, આ મશીન એક ATM સિસ્ટમ જેવું જ છે. જેમાં પૈસા નાખવાથી પકોડી બહાર આવે છે. તેમના જણાવ્યા અનુસાર, સૌપ્રથમ ગ્રાહકે મશીનમાં સ્ટાર્ટ બટન દબાવવાનું રહે છે. ત્યારબાદ કેટલા રૂપિયાની પકોડી ખાવી છે, તે રકમ લખવાની. રકમ લખ્યા બાદ ગ્રાહકે, મશીનમાં નીચેની સાઈડે આપેલી જગ્યામાં રૂપિયાની નોટ અંદર નાખવાની, એટલે મશીન નોટને સ્કેન કરી ઓળખી લેશે કેટલા રૂપિયાની નોટ છે. ત્યારબાદ એન્ટર બટન દબાવી દેવાનું. એટલે એક એક કરી મનપસંદ સ્વાદની પકોડી તૈયાર થઈ બહાર આવશે, જે ગ્રાહક જાતે જ લઈ ખાઈ શકે છે.
નવ યુવાનોને પણ કંઈક નવું કરવાની પ્રેરણા આપી
અનોખો મશીન બનાવતા ગામમાં પણ એક પ્રકારે ઉત્સાહનો માહોલ છે. દેશમાં એકમાત્ર અને પ્રથમ પાણીપુરી માટે મશીન બનાવ્યું હોવાના સમાચાર મળતા જ ભરતભાઈના ઘરે લોકોના ટોળે ટોળા ઉમટી પડ્યા છે. પાણીપુરીના ATM મશીનને નિહાળવા માટે આજુબાજુના ગામડાઓમાંથી પણ લોકો આવી રહ્યા છે. ત્યારે ફાજલ સમયનો સદુપયોગ કરી અને વેસ્ટમાંથી બેસ્ટ બનાવી પોતાની હુનરને મશીનમાં કંડારી અનુકૂળ મશીન બનાવનાર ભરતભાઈ પ્રજાપતિને જોઈ ગામલોકો પણ અભિભૂત બની ગયા છે અને નવ યુવાનોને પણ કંઈક નવું કરવાની પ્રેરણા આપી છે.