જામનગર: મોંઘવારી મુદ્દે કોંગ્રેસનો વિરોધ ઠેર-ઠેર કરવામાં આવી રહ્યો છે. જેમાં આજરોજ જામનગરમાં પણ સરકાર વિરોધી બેનર સાથે વિરોધ નોંધાવવામાં આવ્યો હતો. મોંઘવારીના વિરોધ દર્શાવતા બેનરો લઈને વિરોધ કર્યો હતો. પોલીસે વિરોધ કરી રહેલા કાર્યકર્તાઓની અટકાયત કરી હતી.
ઉલ્લેખનીય છે કે ભારત બંધના વિરોધમાં નિકળેલા ધારાસભ્ય વલ્લભ ધારવીયા પૂર્વ જિલ્લા પ્રમુખની સ્થાનિક પોલીસે અટકાયત કરી હતી. આ સાથે જામનગરના એસટી ડેપો બંધ કરાવવા નીકળેલા લોકોની પણ અટકાયત કરવામાં આવી હતી. ધ્રોલમાં 20 કાલાવાડમાં 39 સિક્કામાં 35 કાર્યકર્તાઓની અટકાયત કરાઇ હોવાની જાણકારી પ્રાપ્ત થાય છે અને જિલ્લામાં કુલ 135થી વધુ અટકાયત કરાઇ હતી.
તો આ તરફ બંધના એલાનને પગલે જામનગરની મોટા ભાગની ખાનગી શાળાઓ બંધ રહી હતી. બાકી ચાલુ રહેલી શાળાઓને NSUI અને યુથ કોંગ્રેસ દ્વારા બંધ કરાવવામાં આવી હતી. આ દરમિયાન કોઈ અનિચ્છનિય બનાવ ન બને તે માટે પોલીસનો ચુસ્ત બંદોબસ્ત ગોઠવી દેવામાં આવ્યો છે.
છેલ્લા 16 દિવસથી વધી રહેલા પેટ્રોલ-ડીઝલના ભાવને પગલે કોંગ્રેસ દ્વારા 10 સપ્ટેમ્બરના રોજ ભારત બંધનું એલાન આપવામાં આવ્યું હતું. જેના પગલે આજે સવારથી જ દેશભરમાં ઠેક-ઠેકાણે ધરણા યોજવામાં આવ્યા હતા અને કેન્દ્ર સરકારનો વિરોધ કરવામાં આવી રહ્યો છે. ત્યારે આજરોજ ગુજરાતમાં પણ વિવિધ સ્થળો પર ભારત બંધના ઘેરા પડઘા પડ્યા હતા.