ભાવનગર: પેટ્રોલપંપ ચાલકોનું ભારત બંધને સમર્થન કોંગી કાર્યકરોનો અનોખો વિરોધ

ભાવનગર: પેટ્રોલ-ડીઝલના વધતા જતા ભાવને લઈને કોંગ્રેસ વિરોધ કરી રહી છે. ત્યારે ભાવનગરમાં ગુજરાતના સૌથી વધુ પેટ્રોલના ભાવ જોવા મળ્યા છે.

જેને લઈને પેટ્રોલપંપ આજે બે કલાક બંધ રાખવામાં આવ્યા હતા અને ભારતબંધને સહયોગ આપ્યો હતો. જો કે પેટ્રોલપંપ બંધ રહેવાના કારણે બહારગામથી આવતા લોકોને ભારે હાલાકીનો સામનો કરવો પડ્યો હતો. 

તો આ તરફ બોટાદ જિલ્લામાં ભારત બંધની વ્યાપક અસર જોવા મળી હતી. જિલ્લાના ગઢડા અને રાણપુર તાલુકામાં સજ્જડ બંધ પાળવામાં આવ્યો હતો. તો ગઢડામાં કોંગ્રેસના કાર્યકર્તાઓ દુકાનો બંધ કરાવવા નીકળ્યા હતા અને સરકારના વિરૂદ્વમાં ઉગ્ર સૂત્રોચ્ચાર પણ કર્યા હતા. ગઢડામાં કોંગ્રેસના કાર્યકરોએ બાઈક દોરીને પેટ્રોલ-ડીઝલની વધતી જતી કિંમત સામે પોતાનો વિરોધ દર્શાવ્યો હતો.



આપને જણાવી દઇએ કે છેલ્લા 16 દિવસમાં સતત પેટ્રોલ અને ડીઝલના ભાવમાં વધારો થઈ રહ્યો છે. છેલ્લા 16 દિવસમાં પેટ્રોલના ભાવમાં 2 રૂપિયા 85 પૈસાનો વધારો થયો છે. જ્યારે છેલ્લા 15 દિવસમાં ડીઝલના ભાવમાં 3 રૂપિયા 60 પૈસાનો વધારો થયો છે. ત્યારે ભાવનગર જિલ્લામાં ભાવ 80 પહોંચ્યો હતો.

ઉલ્લેખનીય છે કે છેલ્લા 16 દિવસથી સતત વધી રહેલા પેટ્રોલ-ડીઝલના ભાવ મામલે વિપક્ષો હરકતમાં આવી ગયા છે અને પેટ્રોલ-ડીઝલના ભાવમાં થઈ રહેલા ભાવ વધારાના વિરોધમાં આજે કોંગ્રેસે ભારત બંધનું એલાન આપ્યું છે. કોંગ્રેસનો દાવો છે કે તેની સાથે અન્ય 21 વિપક્ષી પાર્ટીઓએ ટેકો આપ્યો છે. છેલ્લા 6 મહિનામાં આ ત્રીજી વખત ભારત બંધનું એલાન આવ્યું છે.