AUDIO: ભાનુશાળી હત્યા કેસ મુદ્દે અમેરિકાથી છબિલ પટેલની કથિત ઑડિયો ક્લિપ વાયરલ

ભાજપના પૂર્વ પ્રદેશ ઉપાધ્યક્ષ જંયતિ ભાનુશાળી હત્યા કેસમાં છબીલ પટેલનું નામ સામે આવી રહ્યું છે. ત્યારે છબિલ પટેલની ઓડિયો ક્લીપ વાયરલ થઈ છે. જેમાં છબિલ પટેલ પોતે નિર્દોષ હોવાનું રટણ કરી રહ્યા છે. તેઓ જણાવી રહ્યા છે કે વ્યવસાયના કામે વિદેશ ગયા છે અને તેઓ ભારત આવી પોલીસ સમક્ષ હાજર થવાનો દાવો કરી રહ્યા છે. તેમણે જણાવ્યું કે આ મામલે તેઓ ષડયંત્રનો ભોગ બન્યા છે. જોકે વીટીવી આ ઓડિયો ક્લિપની પુષ્ટ નથી કરતું.

ઉલ્લેખનીય છે કે અગાઉ આ કેસમાં ભાનુશાળી પરિવારે સીધી રીતે છબીલ પટેલ પર આરોપ લગાવ્યાં છે. જ્યારે બીજી બાજુ આ બાબતે છબીલ પટેલના મોટા ભાઈ દિનેશભાઈ પટેલે પ્રતિક્રિયા આપી હતી અને જણાવ્યું હતું કે છબીલ ભાઈ રાજકીય કિન્નખોરીનો ભોગ બની રહ્યા છે. અને સત્ય હકીકત આવનારા સમયમાં સામે આવી જશે. છબીલ પટેલના પુત્ર સિદ્ધાર્થ પટેલે પણ જયંતિ ભાનુશાળીના પરિવારજનોના આરોપોને નકાર્યા છે. સિદ્ધાર્થ પટેલે જણાવ્યુ છે કે મારા પિતા પર લગાવવામાં આવેલા તમામ આક્ષેપો પાયવિહોણા છે. સાથે જ તેમણે જણાવ્યુ છે કે મારા પિતા હાલ અમેરિકામાં છે.

મહત્વનું છે કે ભાજપના પૂર્વ ધારાસભ્ય જયંતિ ભાનુશાળી ભુજથી અમદાવાદ આવી રહ્યા હતા. તે દરમિયાન સયાજીનગરી એક્સપ્રેસમાં તેમની ગોળી મારી હત્યા કરવામાં આવી હતી. જે મામલે જયંતિ ભાનુશાળીના ભત્રીજા સુનીલ ભાનુશાળીએ ફરિયાદ નોંધાવી હતી અને જયંતિ ભાનુશાળીની હત્યામાં છબીલ પટેલ સામેલ હોવાનો આક્ષેપ પરિવાર દ્વારા કરાયો છે જેને લઈને છબીલ પટેલને ભાજપના પ્રાથમિક સભ્યપદેથી સસ્પેન્ડ કરાયા છે.