નુસખા / લોકડાઉનમાં ઘરે આ 7માંથી કોઈ 1 ઉપાય રોજ કરો, સ્કિન એવી ચમકશે કે જોઈને વિશ્વાસ નહીં થાય

• લોકડાઉનમાં બ્યુટીને નિખારવા કરો આ ઉપાય
• ઘરે રહીને સ્કિન પર આપો થોડું ધ્યાન
• આ નુસખા તમારી સ્કિનની સમસ્યાઓ કરી દેશે દૂર

ઓટ્સને મિક્સરમાં બારીક પીસી પાઉડર બોનાવી લો. એમાં મધ અને ગુલાબજળ ઉમેરી સરખી રીતે મિક્સ કરી લો. આ ફેસપૅકને પંદર મિનિટ ચહેરા પર લગાવો. ઓટ્સ ઍન્ટિ-ઑક્સિડન્ટ અને ઍન્ટિ-ઇન્ફ્લેમૅટરીનો ગુણધર્મ ધરાવે છે જે ચહેરાની મૃત ત્વચાને દૂર કરી એને એક્સફોલિએટ રાખવામાં મદદ કરે છે. મધ અને ગુલાબજળથી ત્વચા હાઇડ્રેટેડ રહેશે. અઠવાડિયે એક વાર આખા શરીર પર આ પૅકનો લેપ લગાવી સ્નાન કરશો તો ખંજવાળ અને સનબર્નમાં રાહત થશે તેમ જ ત્વચા સુંદર બનશે.

ઑલિવ, કોકોનટ અને કૅસ્ટર ઑઇલને સપ્રમાણ માત્રામાં લઈ મિક્સ કરો. શુષ્ક ત્વચા માટે આ બેસ્ટ સનસ્ક્રીન છે. કૉમ્બિનેશન સ્કિન માટે બદામ અને ઑલિવ ઑઇલ લેવું તેમ જ તૈલીય ત્વચા ધરાવતી મહિલાઓએ સૂર્યના તાપથી ત્વચાનું રક્ષણ કરવા ઍલોવેરા પલ્પ લગાવવો.

રાત્રે સૂતા પહેલાં કાચા બટાટાનાં પતીકાં કરી આંખની ઉપર પંદર મિનિટ મૂકવાં. ત્યાર બાદ ચહેરો ધોયા વગર સૂઈ જવું. સવારે ઊઠ્યા બાદ ઍલોવેરા અને કાકડીના જૂસને મિક્સ કરી આંખની આસપાસ લગાવો. પફીનેસ અને ડાર્ક સર્કલ માટે આ પ્રયોગ અસરકારક છે.

શુષ્ક ત્વચા ધરાવતી મહિલાઓએ કાચા દૂધમાં રૂનું પૂમડું બોળી ચહેરો સ્વચ્છ કરવો. સામાન્ય ત્વચા હોય તો ચણાના લોટમાં ગુલાબજળ અને કોકોનટ ઑઇલનાં ત્રણ-ચાર ટીપાં ઉમેરી પાંચ મિનિટ ચહેરા પર રગડવું. અઠવાડિયે બે વાર આ પ્રયોગ કરવાથી ત્વચાની ગંદકી દૂર થાય છે.

ચાર બદામને આખી રાત પલાળી રાખો. સવારે એમાં દૂધ અને મધ નાખી મિક્સરમાં વાટી પેસ્ટ બનાવી લો. આ બેસ્ટ સ્ક્રબિંગ છે. તમે ઇચ્છો તો આખા શરીરે સ્ક્રબિંગ કરી શકો છો. તમારી ત્વચા ખૂબ જ તૈલી હોય તો સંતરાની સૂકી છાલનો પાઉડર કરી એમાં અડધી ચમચી દહીં તેમ જ ગુલાબજળ ઉમેરી સ્ક્રબિંગ કરવું.

કેસરમાં દૂધ અને ચંદનનો પાઉડર નાખી પેસ્ટ બનાવી લો. ચહેરા પર ફેસપૅકની જેમ લગાવવાથી પિગમેન્ટેશન દૂર થાય છે. એવી જ રીતે કેળાને મસળી એમાં બે ટીપાં લીંબુનો રસ ઉમેરી માસ્કની જેમ લગાવવાથી ડાઘ-ધબ્બા ઓછા થઈ જાય છે.

આ સીઝનમાં સંતરાં સરળતાથી ઉપલબ્ધ છે. વિટામિન સીથી ભરપૂર આ ફળ તમારી ત્વચાને ચમકીલી રાખવામાં સહાય કરશે. સૌપ્રથમ સંતરાની ત્રણથી ચાર પેશીમાંથી બિયાં કાઢી લો. એમાં મધ અને સંતરાની છાલના ટુકડા ભેળવી મિક્સરમાં એકરસ કરવું. આ પૅકને પંદરથી વીસ મિનિટ માટે ચહેરા પર લગાવો. ત્યાર બાદ સાદા પાણીથી ચહેરો ધોઈ લેવો. એનાથી ત્વચામાં ભેજ જળવાઈ રહે છે. સંતરાની છાલના ઉપયોગથી ત્વચા પર રહેલા ડાઘ-ધબ્બા તેમ જ બ્લૅકહેડ્સ દૂર થાય છે.