હેલ્ધી ફૂડ્સ / કાળઝાળ ગરમીમાં શરીરને નેચરલ ઠંડક આપવા આ વસ્તુઓ ડાયટમાં ખાસ ખાજો, બીમારીઓથી પણ બચીને રહેશો

• ઉનાળામાં રાખો આટલું ધ્યાન
• ઉનાળામાં ઠંડક આપતા ખોરાક ખાઓ
• ગરમીમાં આવા ફૂડ્સ ડાયટમાં ઉમેરો

અત્યારે એવા વિવિધ શાક અને ફળ મળે છે, જેનાથી શરીરને કાળઝાળ ગરમીમાં પણ ઠંડક રહે છે. ઉનાળામાં જ એવા શાકભાજી અને ફળ આવે છે, જેમાં પાણી પુષ્કળ હોય અને તેનો વપરાશ કરવાથી શરીર ઠંડક અનુભવે છે. જેનો સમાવેશ ડાયટમાં અવશ્ય કરવો જોઈએ. 

ફળફળાદિમાં આમ પણ પાણીનો ભાગ વધુ હોય છે. ઉપરાંત, તેમાં શરીર માટે જરૂરી પોષકતત્વો તેમ જ તે એન્ટિઓક્સીડેન્ટ પણ છે. તે ઉનાળામાં શરીરને ઠંડક આપે છે. આવા ફળમાં દ્રાક્ષ, સફરજન, ઉપરાંત ખાસ કરીને તરબૂચ અને ટેટીનો સમાવેશ થાય છે. ફળનો રાજા ગણાતી કેરી શરીરને ઠંડક આપે છે. નારંગી પણ ખૂબ જ ઉપયોગી છે. ફળનો સમાવેશ રોજિંદા જીવનમાં ઘણી રીતે કરી શકાય છે. બપોરના સમયે ભૂખ લાગે ત્યારે, સવારે નાસ્તા પછી અને ભોજન પહેલાં કે ચાલવા જતાં પહેલાં એક ફળ ખાવું જોઇએ. 

શાકભાજી 

એવા ઘણા શાક છે જે શરીરના તાપમાનને નીચું રાખવાનું તેમ જ ગરમીથી બચાવવાનું કામ કરે છે. તેના સૌથી સારા ઉદાહરણ કાકડી, તુરિયા, ગલકાં, કોબીજ વગેરે છે. ફુદીનો, વરિયાળી વગેરે પણ શરીરને ઠંડક આપે છે. આ બધા શાકભાજીમાં વિપુલ પ્રમાણમાં પાણીનો ભાગ આવેલો છે. તે લોહીને પાતળું કરી શરીરને ઠંડું કરવાનું કામ કરે છે. સાંજના સમયે ફકત શાકભાજી કે સલાડ અથવા મિકસ સૂપ લેવાથી પેટ હલકું રહે છે અને ગરમીથી દૂર રહેવાય છે.

કાચા શાક અને ફળ 

બને તેટલા કાચા શાકભાજી અને ફળફળાદિ ખાવાના રાખો. તેમ કરવાથી શરીરને ગરમી ઓછી લાગશે. જો બનાવવા જ પડે તો બાફેલાં, સલાડ બનાવીને ખાવાનો આગ્રહ રાખો. 

મરી મસાલા માપસર ખાવા 

માપમાં મરીમસાલા લેવાથી શરીર લાંબા ગાળે ઠંડક અનુભવે છે. આદુ, લીલાં મરચાં, મરી વગેરે લેવાથી શરૂઆતમાં ગરમી લાગે છે, પરંતુ તે શરીરને ઠંડું રાખવામાં મદદરૂપ થાય છે. 

પ્રવાહી લો 

ઉનાળા દરમિયાન પૂરતું પાણી પીવાથી શરીર હાઈડ્રેટ રહેશે. ઉનાળામાં ચક્કર આવવા, બેચેની લાગવી વગેરે થવાનું કારણ ડીહાઈડ્રેશન છે. પ્રવાહીમાં ઘણી વખત વધુ પડતાં મીઠા અને ખાંડવાળા ખોરાક લેવામાં આવે છે. જે ડીહાઈડ્રેશન વધારે છે અને આઇસક્રીમ કે બીજા ઠંડા પીણા લેવાથી ગરમી વધુ લાગે છે. શરીરને ઠંડું પાડવા માટે પરસેવો થવો જરૂરી છે અને આઇસક્રીમ કે ઠંડા પીણાથી પરસેવો થતો અટકે છે. માટે ઉનાળામાં આઇસક્રીમના બદલે તરબૂચ કે ટેટીનો વપરાશ વધારો.