19 વર્ષીય આશાસ્પદ છોકરી અંકિતા ભંડારીની હત્યા બાદ આખું ઉત્તરાખંડ ઉકળી રહ્યું છે. અંકિતાનો હત્યારો ભાજપ નેતા વિનોદ આર્યનો પુત્ર પુલકિત છે અને અંકિતા પુલકિતના રિસોર્ટમાં રિસેપ્શનીસ્ટ તરીકે કામ કરી હતી.
રિસોર્ટ માલિક પુલકિત આર્ય રિસેપ્શનીસ્ટ તરીકે કામ કરતી 19 વર્ષીય અંકિતા ભંડારીને ત્યાં આવેલા મહેમાનો સાથે શારીરિક સંબંધો બાંધવાનું દબાણ કર્યાં કરતો હતો અને અંકિતાને આવું ગમતું નહોતું અને તેથી બન્ને વચ્ચે અવારનવાર ઝગડા થતા હતા. અંકિતાએ તેના એક દોસ્તને આ અંગે વિગતવાર જાણ કરી હતી. અંકિતાની વોટસએપ ચેટ પણ વાયરલ થઈ છે. તેની પરથી લાગે છે કે પુલિકતે અંકિતાને રિસોર્ટમાં આવેલા ગ્રાહકો સાથે અનૈતિક સંબંધો બાંધવાનું દબાણ કરતો હતો. અનૈતિક સંબંધોનો ઈન્કાર કરવા પર આરોપી પુલકિત અને બીજા 3 લોકોએ ભેગા મળીને અંકિતાને ગંગા નદીમાં ધકેલી દીધી હતી.
અંકિતાએ રસોઈયાને રડતાં રડતાં કહ્યું હતું
હવે આ મામલે અંકિતાનું છેલ્લા કોલ રેકોર્ડિંગ સામે આવ્યું છે. રિસોર્ટમાં રસોઈયાનું કામ કરનાર એક વ્યક્તિએ કહ્યું કે અંકિતાએ મને રડતાં રડતાં ફોન કર્યો હતો અને તેણે મને કહ્યું હતું કે મારે બેગ લાવો, મારે બેગ લાવીને રસ્તા પર મૂકો. જ્યારે રસોઈયો આ બેગ લઈને નીચે ગયો ત્યારે અંકિતા ત્યાં ન હતી. અંકિતા છેલ્લે 18 સપ્ટેમ્બરે બપોરે 3 વાગ્યાની આસપાસ જોવા મળી હતી. રસોઈયાએ કહ્યું કે અંકિતા સહિત 4 લોકો રિસોર્ટમાંથી નીકળી ગયા હતા, પરંતુ રાત્રે 9 વાગ્યે માત્ર ત્રણ લોકો જ પરત ફર્યા હતા. પરંતુ અંકિતા સહિત 4 લોકો માટે જમવાનું મંગાવવામાં આવ્યું હતું. ફોન કોલથી જણાય છે કે પુલકિતે અંકિતાને એક ગેસ્ટ સાથે રાત વિતાવવાનું કહ્યું હતું, પુલકિતની ગંદી ડિમાન્ડ સાંભળીને અંકિતાને ખૂબ આઘાત લાગ્યો હતો અને તે નોકરી છોડવા માગતી હતી.
ગંગા નદીમાં ધકેલીને મારી નાખી
પૌડી ગઢવાલ જિલ્લાના યમકેશ્વર વિધાનસભા વિસ્તારના એક ખાનગી રિસોર્ટમાં રિસેપ્શનિસ્ટ હતી. અંકિતા 18-19 સપ્ટેમ્બર દરમિયાન ગુમ હતી. પોલીસ અને એસડીઆરએફની ટીમો જિલ્લા પાવર હાઉસ નજીક શક્તિ નહેરમાં સર્ચ ઓપરેશન ચલાવી રહી હતી. શનિવારે સવારે પોલીસને ચિલ્લા પાવર હાઉસ પાસે અંકિતાની ડેડબોડી મળી આવી હતી. આરોપ છે કે રિસોર્ટ માલિક પુલકિત આર્યે અંકિતાને હોટલમાં એક ગેસ્ટ સાથે અનૈતિક સંબંધ બાંધવાનું દબાણ કર્યું હતું જેનો અંકિતાને ભારે આઘાત લાગ્યો હતો.