ભારે વરસાદ બાદથી કર્ણાટકના બેંગલુરુ શહેરમાં સ્થિતિ ખરાબ થઈ ગઈ છે. સમગ્ર શહેરમાં ઠેર ઠેર પાણી ભરાયા છે. સેંકડો વાહનો કલાકોથી ટ્રાફિકમાં અટવાયા છે.
કર્ણાટકના બેંગલુરુ શહેરમાં વરસાદી તારાજી
શહેરમાં સર્વત્ર પાણી ભરાતા લોકો પરેશાન
રાજ્યમાં હજુ વરસાદની આગાહી આપવામાં આવી
ભારે વરસાદ બાદથી કર્ણાટકના બેંગલુરુ શહેરમાં સ્થિતિ ખરાબ થઈ ગઈ છે. સમગ્ર શહેરમાં ઠેર ઠેર પાણી ભરાયા છે. સેંકડો વાહનો કલાકોથી ટ્રાફિકમાં અટવાયા છે. રસ્તાઓ તળાવ બની ગયા છે. હવામાન વિભાગના જણાવ્યા પ્રમાણે રાજ્યમાં આવો વરસાદનો કહેર 9 સપ્ટેમ્બર સુધી ચાલુ રહી શકે છે.
#WATCH | Karnataka: Massive traffic jam on Marathahalli-Silk Board junction road in Bengaluru amid severe waterlogging caused due to heavy rainfall pic.twitter.com/KUnF0cuPtR
રાજ્યના ઘણા જિલ્લાઓમાં યલો એલર્ટ જાહેર કરવામાં આવ્યું છે. માછીમારોને દરિયો ન ખેડવાની સલાહ આપવામાં આવી છે. કારણ કે ભારે પવન ફૂંકાઈ રહ્યો છે. બેંગલુરુમાં ભારે વરસાદને કારણે ટ્રાફિકને માઠી અસર પહોંચી છે. અનેક વિસ્તારોમાં વાહનો ડૂબી ગયા છે. નીચાણવાળા ઘરોમાં પાણી ઘુસી ગયા છે.
હવામાન વિભાગે શિવમોગા, કોડાગુ, ઉત્તરા કન્નડ, દક્ષિણ કન્નડ, ચિકમગલુર અને ઉડુપી જિલ્લામાં 5થી 9 સપ્ટેમ્બર સુધી યલો એલર્ટ જાહેર કર્યું છે. રાજ્યમાં એક મહિનાથી સતત વરસાદ પડી રહ્યો છે. સોમવારે ઓફિસ જવા નીકળેલા મોટી સંખ્યામાં લોકો શેરીઓમાં ફસાયેલા હતા.
રસ્તાઓ પર પાણી ભરાઈ જવાથી અને કલાકો સુધી ટ્રાફિકમાં ફસાયેલા રહેવાને કારણે લોકોને પોતાના ઘરે પરત ફરવાની ફરજ પડી હોવાના અહેવાલો પણ પ્રાપ્ત થયા છે. આ સાથે જ ઘણી આઇટી કંપનીઓએ 'વર્ક ફ્રોમ હોમ' માટે સૂચનાઓ જારી કરી છે. કારણ કે ઓફિસ તરફ જતા રસ્તાઓ પાણીથી ભરેલા છે.
આખી રાત પડેલા ભારે વરસાદને કારણે લોકોને પાણી ભરાવાની સમસ્યાનો સામનો કરવો પડી રહ્યો છે. આઇએમડીના આંકડા અનુસાર, બેંગલુરુના સંપંગી રામનગરા વિસ્તારમાં રવિવારે રાત્રે 148 મીમી વરસાદ નોંધાયો હતો. શહેરના મરાઠાહલ્લી, ડોડનકકુંડી, વારથુર, એચએએલ રોડ જેવા વિસ્તારોમાં રવિવારે રાત્રે 100 મીમીથી વધુ વરસાદ થયો હતો.
ભારતીય હવામાન વિભાગે કર્ણાટક માટે 9 સપ્ટેમ્બર સુધી ભારે વરસાદનું એલર્ટ જાહેર કર્યું છે. આ સિવાય બેંગલુરુ, તટીય કર્ણાટકના 3 જિલ્લા અને કર્ણાટકના પહાડી વિસ્તારોમાં ભારે વરસાદની સંભાવના છે.